Wan jngoh u Conrad K Sangma iaki lanot shah siat iap ha Mukroh, dawa ka JSU ban pynrung iaki 36 tylli ki shnong Khasi Pnar sha Meghalaya
Meghalaya Chief Minister Conrad K. Sangma haka sng Balang ula ialam iaka kynhun myntri ban leit jngoh iaki longiing jong ki lanot shah siat iap ha ki Pulit Assam kaba la jia haka shnong Mukroh.
La synranlang ia u Myntri Rangbah da u Deputy Chief Minister Prestone Tynsong, PHE Minister Renikton Lyngdoh, Urban Affairs Minister Snaiwbhalang Dhar bad Social Welfare Minister Kyrmen Shylla.
U Myntri Rangbah Conrad K Sangma ula leit jngoh kiba haiing jong ki lanot bad aiti iaka pisa jingiarap kaba 5 lakh uwei bad ula pynpaw ruh iaka jingsngewlem sha kiba haiing.
U Myntri rangbah ula ong ba ka sorkar kala rai ban pyndam ia baroh ki prokram sorkar bad ki tamasa kum ka dak ban burom ia u nongshong shnong ka Mukroh.
Ha kane ka jingleit jngoh u Myntri Rangbah iaka shnong Mukroh ula iakynduh ruh iaki nongialam sengbhalang bapher bapher kiba pyrshah halor kane ka jingjia siat iap ki pulit Assam.
Ula ong ba ka sorkar kan pynthikna ban ai ka jingbishar kaba hok ia kiba la khlad ha kane ka jingjia shah siat iap kaba la jia haka 22 tarik u Naiwieng bad ka sorkar Meghalaya kala rai ban kyrpad ia sorkar kmie ban phah tohkit ha ka NIA ne ka CBI halor ka jingiap ki san ngut ki riew paidbah bad uwei forest guard jong ka Assam.
U Myntri Rangbah ula ong ba ka kynhun myntri jong ka sorkar Jylla lashai ka sngi Palei kin hiar sha Delhi ban iakynduh ia u Myntri kam Pohiing ka iing bad bud ruh sha ka jingiakynduh ia u Myntri Rangbah ka Jylla Assam.
Ha kane ka jinghiar u CM sha Mukroh, ka Jaintia Students Union kala ai ka dorkhat ha u ban dawa buh iaka police outpost ha Mukroh bad na kaliang u CM ula ong ba ia kane ka kam yn shong pyrkhat namar bala dep rai ban buh ha Barato. Ka JSU kala dawa ruh ban pynrung iaki 36 tylli ki shnong Khasi Pnar kiba don ha Block I ne ki jaka ba khajia sha Meghalaya.
Facebook
Instagram
Youtube
Twitter
Leave a Reply