Wan jngoh VC ka NEHU ia ka community college ha Wahiajer

Syllad | The Rising MeghalayaAugust 16, 2021

U Prof. Prabha Shankar Shukla Vice Chancellor ba thymmai ka skul bah NEHU ula wan jngoh iaka Deen Dayal Upadhyay Community College, Wahiajer, West Jaintia Hills District haka 14 tarik une u bnai.

Nalor u Vice Chancellor NEHU la iadonlang u Prof. Henry Lamin, Principal ka DDU Community College Wahiajer, Dr. J.N. Nayak, Registrar NEHU, Prof. D. Walia Geology Department  NUHU bad u Dr. D. Wargis.

Ka jingthmu jong ka jingwan u Prof, Prabha kadei halor ban shim jingkhein iaki jingduna bad ban pynbha iaka jingdonkam kane ka college khnang ban myntoi ki samla pule ka thain.

U Vice Chancellor, haba kren ha kane ka sngi u pynpaw ruh ia ka jingsngewnguh kaba shikatdei eh ia ka shnong Wahiajer kaba la kloi ban ai sngewbha ia ka jaka jong ka shnong kaba heh haduh 17 acre na ka bynta ban tei ia kane ka College, ka College ka ban kyntiew bad pyntbit ia ki samla pule ha kiba bun ki liang jingpule ka juk mynta la ha ka kam rep kam riang, Electronic, Welding, food processing, weaving, horticulture, food technology bad kiwei de ki rukom jinghikai ka juk stad mynta. Haka juh ka por u Vice Chancellor, u kyntu ia ki samla jong ka thain West bad East Jaintia Hills ba kin ia wan ban pule ha kane ka College bad ha ka juh ka por u ngeit skhem ba hapoh ka jingpyniaid jong u Prof. Henry Lamin, Principal kane ka College kan nang iaid shaphrang.