Wan jurip bad iamir jingmut ka MSOA na ka bynta ka “6th Meghalaya Games 2025” ha Jowai

Syllad | The Rising MeghalayaJune 1, 2024

Shibynta ka jingpynkhreh ia ka lympung ialehkai sports ” 6th Meghalaya Games 2025,” ha Jowai, ka kynhun ki nongmihkhmat na ka Meghalaya State Olympic Association (MSOA) Shillong hapoh ka jingialam jong u Working President u Bah John F Kharshiiing bad u General Secretary u Bah L Pariat lem bad ki ophisar na ka State Sports Association, Meghalaya ha ka 31 tarik Jymmang ki la pynlong ka jingjurip iaki jaka ialehkai ha sor Jowai, West Jaintia Hills District.

Ha kane ka jingwan jurip kane ka kynhun ka la pynlong ruh ka jingiamir jingmut bad u District Sports Officer u Bah K Passah ha ryngkat ka jingiadon lang ki ophisar na ka ophis u DSO bad na ka liang ka West Jaintia District Sports Association (WJDSA) ba la mihkhmat da u Bah Patrick Lamare, Vice- President, Bah  Nangebormi Suting, Football Secretary ha ka jingialang kaba la long hapoh ka ophis u DSO, Jowai.

Hadien kane ka kynhun ka la pynlong ruh ka jingleit jurip ia kiba bun tylli ki jaka ba la pynkhreh ban pynlong ia katei ka lympung ialehkai na ka bynta ki jingdonkam ia ki jingtei bad kiwei pat.

Ki jaka ba la tyrwa na ka bynta ban pynlong ia katei ka lympung ialehkai sport ki kynthup ia ka Kiang Nangbah Stadium, Don Bosco Secondary School, Mihmyntdu, Bosco Pnar Salini Colony, Kiang Nangbah Government College, Amphitheatre ha Moolasyat, Jowai Polytechnic College, Khadar Daloi Law College, Tome Memorial Higher Secondary School, Mooralong, Chutwakhu Indoor Stadium, Jowai Public School, Khimmusniang Indoor Stadium bad ka madan Jrisalein.