Wan jurip u Director Tourism dalade iaka projek pynitynnad iaka sawdong ka Nartiang Temple hadien ka kynnoh bamsap

Syllad | The Rising MeghalayaJuly 22, 2023

U Director jong ka tnad Tourism u Bah Cyril VD Diengdoh dalade ula wan jurip iaka projek pynitynnad bad pynbha iaka sawdong sawkun ka Nartiang Shakti Peeth ban myntoi ki nongiaid pilgrim haka sngi Thohdieng.

Kane ka jingwan jurip jong u ka dei hadien ka jingkynnoh ka Joint Action Committee (JAC) kaba kynthup iaka seng FKJGP, MPUF, JSU bad ka JPWO ba jur ka jingbamsap ban tei iaki jingtei ba har rukom ha ka sawdong sawkun ka temple.

Ka jingpyntrei ia kane ka projek la tip kum ka Nartiang Shakti Peeth lyngba ka PRASAD Scheme ne ka Pilgrimage Rejuvenation And Spiritual Augmentation Drive jong Ministry of Tourism kaba pyntrei da ka Meghalaya Tourism Development Corporation (MTDC). Ka projek kala kynjoh T 4 klur tam bad ka JAC hadien bala ioh iaka jubab RTI ka kynnoh bala pyntrei tang 2-3 klur bad ka jingtrei ka long kaba torti.

Ki jingtei pynbha pynmiat ki kynthup iaki kynroh, khyrdop, ka um dih, ki surok bad lynti iaid kjat, ki gallery ha ka temple, ki jiingtei ha Mawbynna Nartiang kynthup iaka jingpynthaba light, ki jaka shong, ki jaka peitkai bad kiwei kiwei.

Ha kane ka jingjurip lang la iadonlang u Deputy Commissioner, West Jaintia Hills District Bah BS Sohliya nalor kiwei kiwei ki officer, u Dolloi Nartiang Ma B Lamare, waheh shnong Nartiang, u kontraktor bad ki dkhot ka JAC.

U Director ula lum jingialang ban sngap thuh ia ki jingeh bad shim jingkhein na ka bynta ban pyniaid shakhmat iaka jingtrei.

U Bah Cyril haba kren, ula ong ba kane ka projek ka dei kaba dang iaid ka jingtrei bad la hap ban pynsngeh ba don ki jingkylla, hynrei hadien ka jingiakren pynbeit la rai ban sdang biang iaka kam.

Ula ong ruh ba ia kane ka projek yn pyndep ha u bnai Nailur shuwa ka puja.

U Chairman ka JAC uba dei ruh u president ka FKJGP Nartiang Area Unit, Bin Raliang, ula ong ba na kaliang u director Tourism ula kular ban pyndep iaka jingtrei kaba sahteng hashuwa ka puja ha u bnai Nailur. Ula kyntu ruh iaka tnad tourism ban pyntrei kam hok ban shimkhia ban pyndep katkum bala kular namar ba kane ka projek ka dei kaba la mang ban pyndep naduh mynshem snem.