Wan ka Meghalaya ha ka kyrdan ba ar ha ka jingsam khusnam ‘National Energy Conservation Award’

Syllad | The Rising MeghalayaDecember 15, 2024

Ka Jylla Meghalaya ka la shah pynkup burom ha ka sien kaba ar snem kynthih ha ka kyrdan kaba ar jong ka Group D na ka bynta ka khusnam National Energy Conservation Award namar ka jingtrei borbah ban kyntiew ha ka kam pynmih bording, ban pynduna ia ka jingpyndonkam bording bad ban kyntiew halor ki kam ban pynneh pynsah ba iadei bad ka bording.

Ia kane ka jingai khusnam la pynlong da ka Bureau of Energy Efficiency, Ministry of Power, ka Sorkar India, kaba ai jingithuh ia ka jingkut jingmut jong ka Jylla Meghalaya kaba la lah ban pynurlong na ka bynta ban wanrah ka jingkylla ha kaba iadei bad ka mariang lyngba ki sienjam ban pynduna ia ka jingpyndonkam bording.

Ha kane ka jingialang ia don ryngkat lang u Jagdeep Dhankhar Vice President ka India bad u Shripad Naik Myntri khynnah ka Sorkar Pdeng uba khmih ia ka Tnad bording kiba la sam ia ki khusnam sha ki jylla kiba la ioh ia ka jingithuh halor ka jingnoh synniang ban tyngka ia ka jingpyndonkam bording.

Ha ka jingkren u Vice President ua la iaroh ba baroh ki jylla halor ki jingnoh synniang jong ki sha ka thong jong ka ri ban pynneh pynsah bad tyngkai ia ka bording bad ka jingaiti kaba khlem artatien ka jong ki na ka bynta ka jingpynneh pynsah.

U Myntri ka Tnad Bording ka jylla Meghalaya, u Abu Taher Mondal ha ka jingkren u la ong ba ka sorkar ka la pyntreikam ia ki katto katne ki sienjam ban pynduna ia ka jingpyndonkam bording, kata kaba kynthup ia ka jingpyrshang ban pynduna ia ka jingpyndonkam ia ka bording ha ki kam shna bad pynmih tiar, ka jingbei tyngka ha ki renewable energy, ka jingpyntreikam ia ki kor ki bor jong ka juk ka ban pynduna ia ka bording. U la ong ba kine ki jingthmu ki la iarap ban pynduna ia ka jingpyndonkam ia ka bording, kaba long ruh katkum ka thong jong ka sorkar ha kaba iadei bad ka jingpynmih ia ka Carbon.

Nalor kata u Mondal u la ai khublei ruh ia u Myntri Rangbah ka Jylla u Conrad K Sangma halor ka jingkyrshan kaba khlem shongthait ia ka Tnad Bording. Haba aijingithuh ia ki paidbah kiba la shim ia ki sienjam ban tyngkai ia ka rukom pyndonkam bording, u la ong ba kane ka jingioh pdiang khusnam ka dei ka jingpeit bniah katkum ki jingpynpaw lyngba ka State Energy Efficiency Index, ha ryngkat ki policy bad ki rukom treikam kiba iadei bad ka jingtyngkai ha ka jingpyndonkam bording ha ki bynta bapher bapher jong ki jingtreikam.

Ha kajuh ka por u pyntip ruh ba ka sorkar ka la pyntreikam ia ka Meghalaya Energy Conservation Regulation 2017, kaba thmu ban kyntiew halor ka jingpyndonkam ia ki tiar ki tar bording kiba la ioh ia ka BEE Star bad khang pyrshan halor ka jingpyndonkam ia ki  incandescent lamps bad ki magnetic-wire chokes ha tube lights.

“Ka Sorkar ka la thung ruh ia ka State-Level Steering Committee na ka bynta ka jingithuh ia ki mat kiba kongsan ban wanrah ia ka jingkylla ha ka rukom pyndonkam ia ka bording bad na ka liang ka sorkar ka la pynmih ruh ia ka Meghalaya Electric Vehicle Policy 2021, kaba thmu ba 15% na ki kali ha ka jylla kin pyndonkam da ki battery elektrik la kumno kumno naduh u snem 2025,” ula ong u Myntri.

U Sanjay Goyal, IAS, Commissioner bad Secretary ka tnad bording jong ka sorkar Meghalaya, u la ong ba ka jingithuh ka long ka jingpynshisha ïa ka jingshimkhia ba khlem artatien jong ka jylla ban kyntiew ïa ka bording kaba neh. Ka jingthmu kam dei tang ban pynbiang ia ka jingdonkam bording jong ki paidbah hynrei ban seng nongrim na ka bynta ka jingpynbha ia ka jingshaniah ha ka jingshakri bad ka bording kaba neh na ka bynta ka jingkiew baroh kawei ha ka thain. U la kdew ba la thaw ruh ïa ka Demand Side Management Cell ha MePDCL (Meghalaya Power Distribution Corporation Ltd) ryngkat ka jingïarap jong ka Bureau of Energy Efficiency, New Delhi, ban thaw ïa ka rukom treikam kaba biang na ka bynta ban shim ïa ki kam DSM. Ka MePDCL ka la shim ruh ia ki sienjam bapher bapher ban pynduna ia ka jingduhnong ha ka T&D, bad mynta ka jingduhnong ha ka T&D ka long 17.53%.