Wan lute ka kynhun ki khar Bangladesh haki ïing briew ha Umkiang

Syllad | The Rising MeghalayaFebruary 22, 2025

Ka kynhun jong kumba 50 haduh 60 ngut ki khar Bangladesh ha ka step phyrngab jong ka 22 tarik Rymphang ki la wan phrung jubor bad lute naphang ia ki ïingbriew ha ka shnong Umkiang, East Jaitnia Hills, kaba don ha ka thain khappud ka Bangladesh.

Halor kane ka jingjia u Waheh Shnong ka Dorbar Shnong Umkiang, u Bah Lasting Pala u la leit ban ujor da ka ejahar hapoh Umkiang Police Patrlling Post ha kaba u la pynpaw ka jingsngewsih kaba jur ba ha katei ka step ha ka por kumba 2 baje, kane ka kynhun ki khar Bangladesh ki la wan lute na ki iing ki sem jong ki nongshong shnong kiba don hajan ka ktem jong ki shipai BSF da kaba pynpait ia ki tala jong ki iingbriew bad rong lut ia ki tiar ki tar kum ki wait, ki mohkhiew, lyngka, ki mar rep bad kiwei pat.

U la ong ruh ba kane ka jingjia ka la wan jia ha ka por ba ki nongshong shnong ki dang don hapdeng ka jingiohthiah lyngngai.

U la iathuh ba ki don katto katne ki nongshong shnong kiba la iohi ia kane ka kam pyntriem jong kine ki khar Bangla bad pyrshang ban beh krad ia ki, hynrei kine ki runar ki la pyrshang ban pom ia ki da ki wait, hynrei donbok ym shym la don ba mynsaw ha kane ka jingialeh markylliang hashwa ba kine ki runar kin phet krad noh hadien ka jingwan poi shuh shuh ki nongshong shnong.

Kumba ka long mynta u Waheh Shnong u la ong ba ki nongshong shnong ki don hapdeng ka jingsyier mynsiem ban shong ban sah ha la ki jong ki iing ki sem khamtam ha ka por mynmiet.

Kumta na ka liang ka Dorbar Shnong ka kyrpad jur ia ki bor pulit ba kan shim ia ki sienjam kiba donkam katkum ka ain khnang ba ki nongshong shnong bad ka ri kin don hapdeng ka jingshngain.