Wan phet 67 ngut ki samla pule ka Jylla na Bangladesh namar ka jingiakhih ha kane ka ri

Syllad | The Rising MeghalayaJuly 18, 2024

Haduh 67 ngut ki samla pule ka jylla Meghalaya kiba pule hapoh ka ri Bangladesh ki la wan phet noh sha la ka jong ka ri lyngba ka Land Port Authority, Dawki ha ka 18 tarik mynta u bnai namar ka jingiakhih paidbah kaba jur ha katei ka ri halor ka bhah thungkam thungjam.

Hadien kane ka jingiakhih kaba jur ha ka ri Bangladesh baroh kawei kaba la pynmih ia ki jingiakynad hapdeng ki samla pule bad ki bor pulit, na ka liang ka sorkar Meghalaya ha ka 18 tarik mynta u bnai ka la ong ba ka la shimkhia da kaba pynlong ia ka jingiakren bad ka Bangladesh High Commission kumjuh ka Indian High Commission, Land Port Authority, Dawki and Exporters Association bad shim ruh ia baroh ki sienjam na ka bynta ka jingshngain jong kine ki samla pule.

Haduh mynta ki don kumba 202 ngut na India ha kaba 198 ngut ki dei ki samla pule, kata (67 ngut na Meghalaya bad 131 ngut na kiwei pat ki jylla jong ka ri), 101 na Nepal bad 7 na Bhutan kiba la wan rung lyngba ka Dawki naduh ba katei ka jingiakynad ka la khie hapoh katei ka ri ba marjan, ong u heh sorkar.

Ki samla pule kiba la wan da ka bus kaba khatduh eh ki la mih na ICP Dawki ha ka por kumba 6:45 janmiet.

Na ka liang u Myntri Rangbah ka Jylla u Conrad K Sangma ula pyntip ba ka sorkar Jylla kala shimkhia ban iakren bad ka Ophis High Commission ka India bad Bangladesh nalor ka Land Port Authority bad ka Exporter Association. Ula ong ruh ba ka sorkar kala shim ia baroh ki sienjam ba donkam ban pynthikna ia ka jingwan phai suk ki samla ka Jylla na Bangladesh.

Ka sorkar Meghalaya ka la buh ruh da u helpline number 1800-345-3644 na ka bynta ki nongshong shnong ka Meghalaya kiba lah ban donkam ia ka jingiarap namar kane ka jinglong jingman hapoh Bangladesh.

Shuh shuh namar kane ka jinglong jingman ha katei ka ri ba marjan, bad ban iarap ia ki nongshong shnong ka Jylla, ka sorkar Meghalaya ka la phah ruh ia u Bah Hiwot Rymbai, MPS., Additional SP, Jowai (+91 96157 16153) kum u Nodal Officer ha khappud jong ka ri ha ryngkat u Executive Officer, Land Port Authority Dawki, Bah Thomas (‎+91 84150 60802) kum u Assistant. Nodal Officer.