Wan poi ka dongmusa 5th Meghalaya Games 2024 ha nongbah Jowai

Syllad | The Rising MeghalayaJanuary 12, 2024

Ka dongmusa jong ka lympung ialehkai ‘5th Meghalaya Games 2024’ la wan pynpoi iaka ha nongbah Jowai haka 11 tarik Kyllalyngkot haka jingsakhilang u MLA ka Jowai Ma Wailadmiki Shylla, u Deputy Commissioner ka West Jaintia u Bah BS Sohliya nalor kiwei kiwei.

Kane ka lympung ialehkai ba heh ka jylla kan sdang naduh ka 15 tarik haduh 20 tarik Kyllalyngkot ha nongbah Tura, West Garo Hills District ha kaba yn sa plie paidbah da President ka ri India ka Droupadi Murmu ka ban sa long kum ka kongsan.

Ia kane ka dongmusa la wanrah na Shillong da u rangmareh ba pawnam ka Jylla Bah Beningstar Lyngkhoi bad aiti ha u rangialehkai phutbol ka jylla u Marlangki Suting ha Shnong Ummulong, West Jaintia Hills District ban rah sha Mihmyntdu Lad College da ka kali ba don ka dur jong ka tikhor ka 5th Meghalaya Games 2024’.

189 ngut ki nongialehkai mihkhmat iaka West Jaintia sha ka Meghalaya Games ha Tura

Kane k Dongmusa kala iaid lyngba ki jaka ba paw ka Jowai, kata na Lad College sha Mooralong la rah da u Deilang wa-O Nongpluh rangialehkai Badminton, na Mooralong shaduh Iawthymme la rah da u Honda-O-Hi Papang rangialehkai Teakwondo, na Iawthyme shaduh V-Mart, Ladthalaboh da u Ferdinand Suchiang rangialehkai Wushu, na Newhill la rah da u Wankishwa Mawlong rangialehkai Judo, na Newhill shaduh Marian Hill la rah daka Happiness Phawa bad na Marian Hill shaduh Stant Ummulong la rah pat da u rangmareh u Marso Kyndait.

Hashwa ba u kongsan un aiti iaka dongmusa ha u Bah Bah Beningstar Lyngkhoi ban pynpoi sha nongbah Tura, ka la don ka jingialang lyngkot ha kaba u MLA ka Jowai u Wailadmiki Shylla ula kren ai mynsiem bad kitbok kitrwiang ia baroh ki khynnah bad samla ki ban iashim bynta ha katei ka lympung ialehkai baheh ka Jylla.

Nalor u kongsan la donlang ruh u Superintendent of Police West Jaintia Hills District u Ma Chemphang Syrti, u District Sports Officer, West Jaintia Ma Khroobok Passah, ka District Sports Officer, Eastern West Khasi Hills District, Mairang Kong Balarina Syiem, ka District Sports Officer, East Jaintia Hills District Kong Stephanie. M. Rapsang, ki dkhot ka WJDSA nalor kiwei kiwei.

Baroh ki khynnah bad samla ka District ki ban iashim bynta haka Meghalaya Games ki don 200 tam ngut kynthup kynthei bad shynrang haki kyrdan ialehkai bapher bapher kynthup ruh ki jingialehkai tynrai jong ki longshwa (Traditional Game) ka Rah Mookhrah, Dat Mawpoin bad ka Wa·pong Sika.

Iaka jingialang kitbok kitrwiang la pyniaid da ka Kong Daiarisa Lyngdoh bad la ioh ka jingkren pdiang na u Ma Patrick Lamre Vice President WJDSA bad kyntien aikhublei na u Ma Khroobok Passah DSO, West Jaintia Hills District.

Hadien ka jingialang u Ma Wailadmiki Shylla ula aiti iaka dongmusa ha Bah Beningstar Lyngkhoi.