Wan poi ka kynhun ialehkai phutbol ka Bangladesh ryngkat bad u Hamza player English Premier League ha Shillong ban iakhun pyrshah ia ka India

Syllad | The Rising MeghalayaMarch 21, 2025

Ka kynhun ki rangialehkai phutbol ka Bangladesh ki la wan poi ha ka nongbah Shillong haka sngi Palei shi bynta ka jingpynkhreh ban ia aireng pyrshah ia ka India na ka bynta ka AFC Asian Cup 2027 qualifier ka ban long haka 25 tarik Lber ha JN Stadium, Polo.

Ka ban kham khring ia ki paidbah riew ieit phubol ha kane ka jingwan ka kynhun ialehkai jong ka Bangladesh ka long namar ka jingdon jong u Hamza Dewan Choudhury uba dei uwei na ki player ba la ialehkai teng ruh na ka klob ba iakhun ha ka lympung ka English Premier League, ka Leicester City ha ka samoi ialehkai 2023-24 bad ba la leit on-loan noh pat sha ka klob jong ka Sheffield United kaba iakhun ha ka lympuing jong ka EFL Championship Club, u ban iadon lang bad kane ka kynhun jong ka Bangldesh.

U Hamza u dei uba la sain dur ha ka shlem jong ka Leicester City Academy, ha kaba u la rung sha kane ka shlem mynba u dang don kumba 7 snem ka rta, kaba hadien ba u la lah ban san bha bha ha ka jinglong nongialehkai kaba pura ha kaba shipor u la leit ban ialehkai  ha ka dur kum ka on-loan bad ka Burton Albion, katba hadien kane u la wanphai biang sha ka klob ba la saindur ia ka jingim jong u ka Leicester City bad ban mihkhmat kumba 100 sien naduh u snem 2017.

Ka samoi ialehkai kaba u Hamza u la ih bad paw bha ka sap ialehkai ka jong u ka dei hadien ba u la don bynta bad kane ka klob kaba la rah ia ka nam lahduh ka FA Cup ha ka samoi ialehkai u snem 2021. U Hamza u la shah jied ruh ban mihkhmat ia ka kynhun ialehkai U-21 jong ka England, pynban ha u snem 2024, hadien ba u la ioh ia ka passport jong ka ri Bangladesh, u la shim ia ka rai ba un mihkhmat noh pat ia la ka jong ka ri (wikipedia).

Kane ka kynhun, ka la wan poi ha kad liengsuin ha ka Shillong airpot ha Umroi ha kaba la leit ban shaw pat ia ka da ki dkhot nongkitkam ka Meghalaya Football Association (MFA) hapoh ka jingialam u Vice President u bah Cliff R. Nongrum, bah DL Nongbri Jt Secretary, bah Prosper Warjri Treasurer bad bah Freddy Kharpran.

Hadien ba la wan poi ha Hotel Vivanta, ia kane ka kynhun ka pdiang sngewbha pat ia ki da ka jingpynkup ia ki ryndia sha man la uwei pa uwei u player, u coach bad ki nongiarap jong kane ka kynhun.

Haba phai sha kane ka kynti iakhun kaba mynta jong kane ka lympung, ka India la pyniakap ha ka Group C ba don lang ki ri kum ka Bangladesh, Hongkong bad Singapore.