Wan poi ki nongialehkai na ki 11 tylli ki District ka Jylla sha ka Meghalaya Games ha Jowai

Syllad | The Rising MeghalayaJanuary 20, 2025

Ki nonialehkai na ki 11 tylli ki District ka Jylla ryngkat bad ka West Jaintia Hills kaba la pynlong ia ka 6th Meghalaya Games ki la wan poi ha ka 19 tarik Kyllalyngkot ha Madan Ladmukhla, Jowai ban pynkhreh iashim ha kane ka lympung.

Ia kine ki nongialehkai la pdiang sngewbha da u MLA ka thain u Bah Wailadmiki Shylla, Deputy Commissioner Bah. B. S Sohliya, IAS, Additionally Deputy Commissioner Kong D. V Lyngdoh ha ryngkat ki heh ophisar na ka district bad ka jylla.

Na ka liang u MLA u la pynshlur ia ki nongshong shnong jong ka District ba kin pdiang sngewbha bad ai ka jingkyrshan kaba pura ia ki nongialehkai ha ka por ba ki don bad ki shong ki sah hapoh ka district khnang ba kan don ka jingsngew juh sngew jan bad kaba ai mynsiem.

Ki katto katne ki nongialehkai ki la pynpaw ia ka jingkmen bad ka jingsngew hun ha kaba iadei bad ka rukom pynkhreh bad pynbit pynbiang bad kiba bun ki la pyrto ruh ia kane ka jingpdiang sngewbha kaba shongkun bad kaba la pynkhreh janai bha.