Wan poi ki rangialehkai ka Maldives ha ka nongbah Shillong, sdang ia ka jingkilan met

Syllad | The Rising MeghalayaMarch 18, 2025

Ki rang ialehkai phutbol ka Maldives kiba la wan poi ha ka nongbah Shillong naduh ka janmiet jong ka 16 tarik Lber ki la sdang ban hiar madan na ka bynta ka jingkilan met ha madan SSA Stadium, First Ground, Polo.

Lah ban kdew ba kane ka kynhun ka la wan poi ha Shillong, kum shi bynta jong ka jingialehkai paralok (International Friendly), ha kaba kan iakhun pyrshah ia ka kynhun ialehkai jong ka India ha ka janmiet jong ka 19 tarik mynta u bnai, ha JN Stadium, Polo, Shillong.

Kane ka kynhun ka la wan poi ha katei ka sngi hapoh ka kad liengsuin ha Umroi (airport) ia kaba la leit ban pdiang sngewbha da bah Cliff R Nongrum bad bah Freddy Kharpran Sun, kiba long Vice President bad dkhot ka Meghalaya Football Association.

Na ka liang u Coach ka kynhun ialehkai ka Maldives, u Ali Suzain ha kaba nyngkong u la ai ka jingiaroh ia ka nongbah Shillong ha kaba u la pynpaw ba ka jinglong jingman jong ka suinbneng ka long kaba lam khriat, hynrei kaba biang bad paka pat na ka bynta ka jingialehkai ia ka phutbol bad kyrmen ba ki player ki jong u, kin lah ban ialehkai bha.

Haba jubab ia ka jingkylli hato kum ka kynhun ka wan poi lut bad ki rang ialehkai ba kynsai, na ka liang u Suzain u iathuh ba baroh ki rang ialehkai ba kynsai ki la don lang bad ka kynhun ha kaba u sngew donbok ruh ba baroh ki don ruh hapdeng ka met ka phad kaba koit bad khiah bad ki long kiba la pynkhreh na ka bynta kane ka jingiakhun ka ban wan.

Ka kynhun ki rang ialehkai phutbol ka India ruh ki la long kiba la pynkhreh ba kin mih madan ban ia aireng pyrshah ia ka Maldives ha kane ka jingialehkai paralok kaba la buh ban long ha ka 19 tarik Lber bad ba kan sa bynrap lang pat bad ka jingiakhun pyrshah ia ka Bangladesh na ka bynta ka Asian Cup Qualifier 2025, kaban long ha ka 25 tarik Lber.

Kumba ka long na ka liang ki rang ialehkai ka India ryngkat bad u khlur ialehkai ba la wanphai biang na ka jingshongthait u Sunil Chhetri ki ka hiar ban iuhkjat ha madan ialehkai jong ka JN Stadium, Polo, ha kaba ki la ioh ia ka lad ban ia kilan lang khrui kum ka kynhun hadpeng ka jingpeit pyrman bha ka jong u coach ba rangbah ka ri.

Hashwa ba ka kynhun ki ki rang ialehkai India kin ia kilan met na ka liang ka Meghalaya Football Association (MFA) hapoh ka jingialam u bah hamletrson Dohling, bah Sunesh M Syiem kum president bad secretary lem bad ki dkhot nongkitkam, ki la pdiang burom ia kane ka  kynhun, kaba long artad kum ka dak ka jingai mynsiem bad jingkyrshan ia baroh ki rang ialehkai.

Kine ki artylli ki jingiakhun jong ki international match, kiba dei artad ka sien kaba nyngkong ba kum ka jylla kan ioh ba kan pynlong, ka la ktik bha ruh ia ka mynsiem ki riew ieit phutbol ban ioh ban sakhi da la ki jong ki khmat ia ki rang ialehkai ba kynsai jong ka ri ban iakhun ha kine ki artylli ki jingiakhun.