Wan poi Shillong ki khynnah ba kem pang na ka bam ha Karnataka, kular pynrung skul ka sorkar

Syllad | The Rising MeghalayaApril 23, 2025

Ki 22 ngut ki khynnah skul kiba la kem pang naba bam ia ka bam kaba la sniew ha Mandya, Karnataka ki la wan poi ha ka nongbah Shillong haka 23 tarik Iaiong ha kaba na ka liang u Myntri ka Tnad Social Welfare u Bah Paul Lyngdoh u la pynthikna ba ia baroh kine ki khynnah yn pynrung noh mardor ha ki skul sorkar.

Haba pdiang sngewbha ia ka jingwanphai jong kine ki khynnah ha ka jingialang kaba la long ha ka ophis treikam jong ka Directorate of Social Welfare, u Bah Paul u la ong ba kane ka dei lyngba ka jingtrei shitom jong ka Tnad lyngba u Director bad ki ophisar ha kaba laingut na ki, ki la leit ban synran ia kitei ki khynnah naduh na Karnataka.

“Ha ka por ba ki la don ha Karnataka ki la hap ban pynbit pynbiang ia baroh ki jingdonkam bad ban pynthikna ba ka jingpyndep ia baroh ki kam kan long katkum ka lynti jong ka ain.Hadien ba la pyndep ia ki kam baroh ka kynhun na Karnataka hapoh ka jingialam da u nongialam ka kynhun jong ka Child and Women Rights Commission ki la mynjur ban synran bad ban wan ialam ia kine ki khynnah sha Shillong,” ong u Bah Paul.

U la pyntip ruh ba ki kmie ki kpa jong kine ki khynnah ki la ioh ban iakren bad ki arngut ki ophisar kiba mihkhmat ia ka Tnad pule puthi na ka bynta ban pynkhreh ban pynbiang ia ki jaka pule na ka bynta jong ki.

“Mynta ba ki la iehnoh shiteng ia ki jingpule jong ki, na ka liang ka Tnad pule puthi ka la pynthikna ia ngi ba kan donkam 2-3 sngi ban pyndep ia ki jingdonkam bad hadien kane kin pynthikna ba kine ki khynnah kin ioh rung ha ki skul ba la pyniaid da ka sorkar ha ki jaka kiba jan bad ki jaka sah jong ki,” u la pynthikna.

U la bynrap, “Mynta ha ki katto katne ki jingjia ki kmie ki kpa ruh ki dei kiba leit trei na kawei ka jaka sha kawei pat, kaba mut ba ki kynriah jaka nawei shawei, bad ha kum kine ki jingjia ngin sa shim ia ka jaka sah kaba thikna jong ki khnang ban pynthikna ban pynrung ia ki ha ki skul kiba don marjan bad haba ki leit shong leit sah noh sha kiwei ki jaka ruh ki donkam ban aijingtip lypa khnang ba ngin lah ban pynbeit ia ka jingpynrung skul haba ki kynriah na kawei ka jaka sha kawei pat.”

Haba kylli, u Myntri u la ong ba na ka liang ka Sorkar hi kam don jingtip ei ei ruh ha kaba iadei bad ka jingphah leit skul ia kine ki khynnah sha Karnataka.

“Ki kmie ki kpa jong kine ki khynnah haba ki la rai ban phah ia la ki jong ki khun sha Karnataka, ki la leh lyngba kawei ka kynhun treimon sngewbha kaba dei na Jowai, West Jaintia Hills District, bad ka jingiakren ka la sdang hapdeng ki nongialam jong kane ka seng bad ki kmie ki kpa bad kumta kam don bynta ei ei ruh bad ka sorkar. Kim shym la pan jingiarap ne pan jingmut na ka sorkar, hynrei dei tad hadien katei ka jingjia ba sngewsih na ka jingkem pang noh na ka bam kaba ngi la duh noh ia arngut napdeng jong ki ba ki la pyntip sha ka sorkar,” u la ong.

“Ha kano kano ka jinglong jingman kaba iaid beit, ka jingai jingmut ka jong ngi ka long ba wat lada kum kine ki khynnah ki donkam ban leit pule shabar ka jylla ki dei ban wad ia ka jingbtin lynti bad ka jingiarap na ka sorkar Meghalaya bad ha kaba iadei bad ka pule puthi ha ka jylla, ngi la ioh ia ka jingbthah ban pynthikna ba baroh ki khynnah ki dei ban ioh ia ki jingpule naduh ka 6 haduh ka 14 snem rta hapoh ki kyndon ka RTE Act 2013,” bynrap u Myntri.