Wan pynhap pyrda u MP Rajya Sabha iaka Golden Jubilee ka Dorbar Shnong Moosalyngkat

Syllad | The Rising MeghalayaDecember 31, 2021

U MP Rajya Sabha Dr Wanweiroi Kharlukhi ula wan ban pynhap pyrda iaka jingrakhe lyngkhuh snem ba 50 (1970-2020) ka Dorbar Shnong Moosalyngkat haka sngi Thohdieng.

Nalor u Dr Wanweiroi uba long kum u kongsan la iadonlang u MP Lok Sabha VH Pala uba long kum u symbud kongsan, Andrew Shullai MDC Jowai Central, Dolloi Elaka Jowai ma Puramon Kynjing, Waheh Shnong Moosalyngkat R Tariang, General Secretary R Khiangte bad kiwei kiwei.

U Dr Kharlukhi ula pyllait paidbah iaka souvenir, maw nongrim bad pynhap iaka lama jubilee.

U Dr. Kharlukhi ula ong ba na kaliang u MP Scheme jong u ym pat lah ban kular eiei ban pynioh jingiarap iaka shnong Moosalyngkat, hynrei un pyrshang ban iakren bad u Myntri Rangbah ka Jylla ban pynioh lyngba ka Chief Minister Development Fund.

Ha kane ka sngi la pynkup burom ia ki nongialam ba seng iaka shnong Moosalyngkat bad la sam ruh iaki khusnam sha ki nongjop ha ki jingiakop bapher bapher. La pynshongshit ia kane ka sngi da ka jingrwai jingshad ba la iashimbynta da ki khun ka shnong bad kynthup iaki khynnah, samla bad longkmie longkpa.