Wan pynhap pyrda u Myntri tnad Sports iaka lyngkhuh snem ba 25 snem ka Lion Sport & Youth Affairs

Syllad | The Rising MeghalayaJanuary 8, 2022

U Myntri ka tnad Sports & Youth Affairs ka sorkar Jylla u Bah Banteidor Lyngdoh ula wan ban pynhap pyrda ïaka lyngkhuh snem ba 25 (Silver Jubillee) jong ka Lion Sport & Youth Affairs (LSYA), Jowai haka sngi Saitjain.

Nalor u myntri la iadonlang ruh u Ma Phasmon Dkhar, EM-JHADC kum u symbud kongsan, u Ma Andrew Shullai, MDC Jowai Central, ki riew rangbah, ki longkmie bad kiba shah khot sngewbha.

Ïaka jingïalang la pynïaid da u Donkupar Syngkrem, President LSYA, Jowai bad la ïoh ka jingpule Bible bad duwai na ka samla Pynhun Shylla katba u Pynhiam H Kharkongor, Adviser LYSA ula ïathuh ïaka khana lyngkot ka jingïaid lynti ka LSYA

U Phasmon Dkhar haka jingkren ula ai mynsiem ïaki samla ban im sngi haka ban pynbha pynjanai ïa kiei kaba ki longshwa manshwa ki la buh na ka bynta ka pateng.

Ha kane ka sngi la pyllait paidbah ruh iakaSouvenir jong ka jingiaid lynti ba 25 snem ka LSYA.

U Bah Banteidor Lyngdoh, haka jingkren ula ïaroh ïaka LSYA, Jowai kaba la shimkhia ban ïalam lynti ïaki samla kaba long ka nuksa ba bha ïa kiwei ki shnong.

Kum ka dak ban pynsah jingkynmaw ïaka jingwan ïuhkjat jong u myntri la pyllait paidbah ruh ïaka Riti treikam ne Constitution ka LSYA, Jowai kumjuh ka Music Video kaba thaw halor ka phang kaba ong, “Yutran warim wa sein nachwa, ki khmat salan u nang pynmiat pynbha”,.

U Myntri ula ai synniang da ka Computer bad u kular ruh ban pynïoh ïaka Badminton Court Mat ne ka carpet na bynta ka LSYA.