Wan pynkut u Rakkam Sangma iaka jubili rupa ka Kymprup Higher Secondary School, Sahsniang A

Syllad | The Rising MeghalayaDecember 14, 2023

U Myntri ka tnad Pule Puthi ka Sorkar Jylla u Rakkam A Sangma haka 13 tarik Nohprah ula wan ban pynkut iaka jinglehkmen jubili rupa ka Kymprup Higher Secondary School Sahsniang-A.

Nalor u Myntri u Rakkam A Sangma uba long kum u kongsan, la donlang ruh ki MDC ka JHADC kiba kynthup ia u MDC ka Sohmynting u Lakhon Dkhar uba long kum u symbud kongsan, u Winning Garland Sungoh MDC Mowkaiaw, u Habahun Dkhar MDC Saphai, Nidamon Chullet bad kiwei kiwei.

U Rakkam A. Sangma haka jingkren ula ai ka jingiaroh iaki bor pyniaid skul, ki nonghikai kiba la ai iaka jingshakri ha kaban sam iaka jingnang jingstad sha ki khynnah jong kane ka ka shnong bad ki shnong ba marjan.

Kam dei kaba suk ban jam ia u mawmer ba 25 tylli ki snem, lada ki bor pyniaid ka skul, ki nonghikai kim trei shitom, hynrei dei namar ka mynsiem kaba rhem haki ban sam iaka jingnang jingstad, kane ka skul kala kiew shaphrang, ula ong Myntri bad hakjuh ka por u kitbok kitriwng bad ai iaka jingkyrkhu kyrdoh ba ka skul na roi nang par ha baroh ki liang bad ban pynim iaki khynnah skul kiban long ki myntoi ka imlang ka sahlang.

Ha kaba iadei bad ka mat jingdawa ban pynrung iaka skul haka Adhoc Grant na ka liang u Myntri ula bthah iaki bor pyniaid skul ba pynbiang iaki kot ki sla kiba donkam.

Shuh shuh ula ong ba ha kaba iadei bad ka rai ka sorkar ban pyndonkam noh da ki kot NCERT naduh ka klas I haduh 10 jong ka Meghalaya Board of School Education (MBoSE) ka thong ka long ban wanrah iaka juh ka standard ne ka curriculum kaba iadei bd ka ri baroh kawei.

“Kane ka jingshim iaki kot NCERT ka long haka sobjek Science, English bad Mathematic bad yn pynrung lang bad ki subject kiba iadei bad ka Jylla ban iarap iaki khynnah ban shemphang,” la ong u Rakkam.

U Myntri ula ong “Ngi la shim iaki kot NCERT ban iarap iaki khynnah ban iakhun ha ki eksam UPSC, IPS, IAS, GMAT bad kiwei kiwei entrance hapoh ka ri namar ki eksamin hi pyndonkam da ka syllabus NCERT.”

Haba phai khyndiat halor ka jingiaid lynti bad ka history jong ka skul, haduh u snem 1998 ka don tang kawei ka skul haka shnong Sahsniang A kaba dei ka Govt. LP School kaba ai jinghikai haduh Class-IV. Ki khynnah skul ki iai pass man u snem na kane ka skul tangba bun na ki, kim lah ban bteng shuh iaki jingpule namar ba kim kot bor ban leit sha kiwei pat ki shnong ne sha sor.

Ki nongialam jong ka Dorbar Shnong haba iohi iaka jingeh jong ki khun ka shnong kila seng iaka Kymprup Upper Primary School Sahsniang A’ ha u snem 1998 bad la pynlong skul ha iing barit jong ka Balang Presbyterian Sahsniang bad hadien ka skul ka la ioh la ka jong ka iingskul ha syndah bad ka skul kaba mynta. Ha u snem 2008 la kyntiew kyrdan noh iaka Upper Primary shaka Secondary bad ha u snem 2019 la kyntiew kyrdan iaka Higher Secondary School kaba tip kum ka Kymprup Higher Secondary School Sahsniang A.

Kumba long mynta ka jingdon jong ki khynnah haka Upper Primary Section ki long 140 ngut haka Secondary 108 ngut bad haka Higher Secondary ki long 28 ngut katba ki nonghikai ki long 14 ngut bad uwei u non-Teaching Staff.

Ha kane ka sngi u Myntri pyllait paidbah iaka Souvenir bad u maw sah jingkynmaw. La pynphuh pynphieng ia kane ka sngi da ki jingrwai jingshad ba la shim bynta da ki khynnah kane ka skul.

Iaka jingialang la pyniaid da u Founder Syngkon bad la ioh ka jingkren na u Principal ka skul u H Kamar bad na u Waheh Shnong D Ymbon haka jingdonlang ki nongshong Shnong kynthup naduh ki longkmie longkpa, ki nonghikai bad ki khynnah skul.