Wan sakhi iaka Lukha Festival ban mad ka jingkmen bad jingsngewtynnad ba kham pher

Syllad | The Rising MeghalayaFebruary 1, 2024

Wan ban mad bad sakhi ïa ka tamasa kaba lah ban pynsah kynmaw junom ka Lukha Festival kaba Saw, ka ban long ha ka 2 bad 3 tarik u Rymphang, ba pynbit pynbiang da ka Sonapyrdi Tourism bad Economic Development Society (STEDS).

Ngeit skhem ba ka jingwan jongphi sha kane ka tamasa phin ïoh ban mad ka jingkmen bad jingsngewtynnad ba kham pher hapdeng ba don bunjait ki jinglehkai bad ki tamasa bapher bapher bad lah mang naduh ki khyllung khynnah haduh ki samla Rangbah.

Ha ka sngi ba nyngkong kata ha ka 2 tarik kan don ka jingïakob king lieng, ka jingïakob shondur, ka jingkynjat bol ha rud um bad ka jingïakob pynibriam hapdeng ki heprit.

Ym tang katta ha kane ka sngi kin don ruh ki tamasa jingngam um ne ka scuba diving bad ban sakhi ruh ïa ka  rong ka rup jong ka jingïakob Thei Bhabriew ba lah tip kum ka Miss Lukha 2024, lait na kine yn wan ban pynshongshit  ruh da u kaitor ba paw ha kine ki sngi kata u Samla Wanjop Sohkhlet.

Ha ka sngi kaba bud kata ha ka 3 Tarik u Rymphang kan don ka jingïalam ïaidkjat sha ki jaka ba don ki mrad khlaw kata sha Narpuh Wildlife Sanctuary. Ha kajuh kane kan don ka jingïakob shondur bad dro dur, kumjuh ruh ym pynbud biang ka jingkynjatbol ha rud um bad ka tamasa ngam um. 

Hapdeng ba ka Meingi ka lah sdang ban sep pat, lah pynkhreh ban pynshongshit  ïa ka janmiet ba kem ïongrein da ka jingwan ban ïashim bynta da ki kynhun nongtem kiba pawnam  ki Summersalt bad ki jingtem ban pynkhih met jong ki DJ ba kynthup u Fred, Meban, bad Jelly.

Wat pynsepei ïa kine ki arsngi ki ba lah ban long ki sngi ba pynjah ïaphi na ki jingkhuslai bad pynjahthait na ki jingbunkam, wan bad wer ïa la ki paralok sha ka Tamasa Lukha Festival – hapdeng ba ka jingshemthymmai kan khlehlang bad ka jingkmen bad sngewtynnad ba kham pher.