Wan sakhi ki samla Niam Tynrai ka Mizoram ïaka Kiew Pyneh Rngiew ha u Lum Sohpetbneng

Syllad | The Rising MeghalayaFebruary 8, 2023

U samla nongialam ka kynhun kiba dang bat da ksoh ia ka niam tynrai jong ka jylla Mizoram, u  u Fela Thiangte u ba bat kum u Asst Secretary jong ka  kynhun ba la ai kyrteng Sakhwa, lem bad ki paralok ki jong u, ki la wan ha kaban sakhi  ia ka Kiew Pyneh Rngiew sha u Lum Sohpetbneng jong ka seng Khasi Kmie, kaba la long haka 5 tarik u Rymphang.

Haba kren bad u nongthoh khubor, u Fela u pyntip ba kane ka seng niam tynrai ha Mizoram, ki don mynta kumba san hajar ngut ki nongbud bad ia ka niam tynrai ka jong ki la juh tip ruh kum ka Lalhnam.

Nalor katta u la pynpw ba u dap da ka jingsngewkmen ba un shem bad iohi ia u paid byllein ka bri u Hynñiewtrep Hynñiaw Wasa ba kin ia shim bynta shit rhem sha ka jingkiew pyneh rngiew  kaba shi sien shi snem jong ka Seng Khasi Kmie.

Nalor katta u Fela u sngew ruh ban ong ba u dap bad shlei lem ka mynsiem ka jong u katno tam lei lei ha kaba un ioh ba un sakhi bad ruh pule bniah ia ki nongrim tynrai jingngeit niam Khasi kaba janai.

Ula ong ruh ba ha kne ka jingwan ban ia sakhi lang ia kane ka kiew pyneh rngiew, u sngew ba u long uba donbok shisha ban sakhi ia kum kane ka sngi, ia kaba un ioh ba un rah rneng bad ruh ban iarap ban batai ne ban pynshai lem sha la ki para nongbud ha Mizoram bad ha ka thain shatei lam mihngi hi baroh kawei ba da kumno ba ki trai ri ki trai muluk kin ieng skhem halor ka nongrim bad pynneh pynsah ia ki matti u mynbarim u jong ki.

Haba kylli la don eiei ne em kaba jan ia syriem jong ka niam ka rukom ki Khasi bad Mizo ba dang neh ha la ka niam tynrai, u Fela u  la ong ba khyndiat khynsoit ka don ka jingiasyriem, ha kaba  ka jaka ba ki ia lum ia lang ka long ha I kynja iing trep, kaba hangne u lyngdoh niam u juh ai ia ka sneng ka kraw ka kyntu ka kynpham bad ka juh don ruh ki jingiashad.

Kaba sngewtynnad ban iohsngew nau Fella lyngba ka jingiakren kalong ba kum u dkhot jong ka kynhun niam tynrai, ki dak ki shin jong ka jingkiew ne leit phai biang ki paid Mizo sha la ka niam tynrai kaba ki don ka iai kiew suki pa suki bad u khmih lynti ba ha ki snem kiba  kham shadien, kum ka kynhun kan sa nang roi ha ka jingwan phai biang ki paidbah.

Kyntang ia wai u Fela u khot bad wer sngewbha ia ki nongialam ka Seng Khasi Kmie ba ma ki ruh ba kin pyllait ia la ka jong ka por ba kin leit lem sha Mizoram ban ia shem ia kynduh ia ki nongialam niam tynrai bad ban ioh ruh ban ia kren bad ia phylliew jingmut halor bad ruh ban ioh ban batai sani bha ia ki la riti ba ki bat ki ksoh haduh kine ki sngi kiba mynta.