Wan shakhmat ban test, ban iada iaka jingpur ka HIV/AIDS: Rinibeth Patlong

Syllad | The Rising MeghalayaFebruary 25, 2022

Ka Rinibeth Patlong, PM, TI Khliehriat kala ong ba ka jingpang HIV/AIDS ka dei ka jingpang kaba ym lah ban pynkoit, hynrei lah ban iada na ka jingsaphriang na u/ka wei sha u/ka pat, hynrei kaba kongsan ka long ba donkam ia u/ka nongpang ban wan shakhmat ban leh iaki test ban iada bad iakhun pyrshah ia kane ka jingpang.

Ka Kong Rinibeth kala ong ia kane haba kren haka jingpynsngewthuh paidbah haka shnong Pynthorkba, Moolang, East Jaintia Hills District. Ia kane ka prokram la pynlong da ka Chankylliang Development Society (CKDS) lyngba ka Link Worker Scheme Khliehriat da ka jingiatreilang bad ka Meghalaya AIDS Control Society bad ka shnong Moolang haka sngi Palei.

Kong Rinibeth Patlong haba kren shuh shuh ba kane ka jingpang kala kynrei bha ha rilum Jaintia bad ki don ruh ki khynnah kiba iabit ia kane ka jingpang. Ka long ba kum ia kine ki briew kiba iabit iaka jingpang HIV/AIDS ka imlang ka sahlang kam dei ban kyntait hynrei dei ban ïarap ïaki ban pynsngewthuh ïaki ban kin ïoh ka jingsumar ba paka bad ba tista ban lait saphriang ka jingpang bad kala ban jur ba ki nongpang kin wan shakhmat ban shim iaka jingmyntoi ba ai ei ka sorkar ban leh iaki test.

Ïaka jingïalang la pynïaid da u Rimiki Lathong bad la ïoh jingpynshai na ki riew shemphang ba kynthup u District Resource Person (DRP) ka Link Worker Scheme u Kynsaibor Kharkongor, U Zonal Supervisor u Dauni Wanemi Sutnga ula batai ïaka jingmut jong u Red Ribbon uba dei u muhor ne symbol jong ka HIV/AIDS.

Ha kane ka sngi lyngba ka Mobile ICTC (Integrated Counselling &Testing Center), Civil Hospital Ialong la pynlong ruh ka jingpeit bniah ne test ïaki katto katne ngut ki nongshong kiba la wan shakhmat.

Ïaka jingïalang la pynkut da ki kyntien ai khublei na ka Zonal Supervisor ka Kong Haphadahun Simpli.