Wan shakhmat ka East Khasi Hills ha ka jingdon ki POCSO Case, ong ka kaiphot ka SCPCR

Syllad | The Rising MeghalayaMarch 1, 2024

Ka Meghalaya State Commission for Protection of Child Rights (SCPCR) lyngba ka kaiphot ka pyntip ba ka East Khasi Hills ka dei ka District kaba wan ha ka kyrdan kaba hakhmat eh ha kaba iadei bad ka jingdon jong ki POCSO Case, kata ka jingdon jong  ki kam lehbor ne leh beijot pyrshah ia ki khynnah kynthei.

Kane ka kaiphot la pyllait paidbah haka 29 tarik Rymphang haka jingialang pyllait ia ka Kot POCSO Act 2012 ba la pynkylla sha ka ktien Khasi “Ki kyndon ain” ha ka jingialang kaba la long hapoh Pinewood hotel Shillong.

Ka Case kaba nyngkong ba la registar hapoh ka POCSO Act ka dei kaba la jia ha ka 4 tarik u Jylliew 2013 hapoh ka iingbishar POCSO ha East Khasi Hills.  Ka kaiphot ka SCPCR kaba pyntip ba naduh ba sdang pyntreikam ia ka Protection of Children from Sexual Offences (POSCO) Act 2012, kila don haduh 2566 tylli ki case ha kaba 1984 tylli ki dei kiba dang don hapdeng ka jingshim bishar hapoh ki iingkashari bapher bapher jong ki District.Katba ka jingpyndep ia ki jingshim bishar ia ki POCSO Case ha ka jylla ka long 22.68%.”

Nalor kata ka kaiphot ka shem ruh ba ha ka por ka jingsar jong ka khlam Covid-19 ka jingdon jong ki case ka dei kaba heh tam, kata da haduh 365 tylli ha u snem 2020 bad 378 tylli ha u snem 2021.

Haba phai sha ki district level ka East Khasi Hills ka dei kaba wan hakhmat eh ha ka jingdon jong ki POCSO Case ba la registar, kata haduh 709 tylli kaba long haduh 28% na baroh ki POCSO Case ha ka jylla, katba ka South Garo Hills ka dei kaba Duna tam, kata tang 2% kaba long baroh 64 tylli ki case.

Katba ha kaba iadei bad ka jingpynbna ia ki rai pynrem ia kiba donkti ha kine ki jingleh kam bymman ka Ri Bhoi District ka dei kaba bun eh, kata da haduh 50 tylli bud ka West Khasi Hills 31 bad marbud ka East Khasi Hills da 30 tylli ki rai pynrem.

Ka kaiphot ka la don ruh ba watla ka South Garo Hills bad ka South West Garo Hills kim shym la sakhi kawei ruh ka rai pynrem namar ka jingshisha halor ka jingbym don ki Special Public Prosecutor (SPP) ban shim bishar bad kumta ruh baroh ki case ki la sahteng hapoh ka kashari jong ki district.

Kumjuh ka South West Garo Hills district kaba la don ia ka iingkashari POCSO naduh u snem 2017 hynrei watla katta ym pat don satia kawei ruh ka case kaba iadei bad ka jingpynbna ia ka rai pynrem.

Lah ruh ban kdew ba ka jingdon ha kaba iadei bad ki rai pynrem ka la nangkiew man la u snem bad ka jingdon bun eh kiba shah rai pynrem ka dei ha u snem 2022 ha kaba ki la don haduh 60 tylli ki rai pynrem bad 31 tylli ha u snem 2023.

Ka kaiphot ka ong ba ka donkam ban pynjur iaka jingialap pynsngewthuh iaka hok ki khynnah. Naduh ki nongialam shnong, ki seng longkmie, ki seng samla, ki samla pule, ki kynhun niam, ki wei kiwei ki seng trei mon sngewbha.

Nalor kata ka donkam ruh ban buddien bad ki lanot bad ka jingiasyllok ban lait na ka jingshah ban bein ne ipoh. Ka Commission kala buh ruh iaka thong kaba hakhmat eh ban pynsted ban pyndep iaka jingbishar ban ai ka jingbishar kaba hok iaki lanot.

Ka Commission kala ong ban iada iaki khynnah kaba kongsan eh ka donkam ruh iaka longiing longsem ban don ka jingiajan bad jingiadei kaba jan bad ki khynnah, namar kane ka bynta kala synjor kaba buh jingma.