Wan shakhmat ki paidbah ban ai i aka tika COVID-19 ha shnong Kynjat Phutbol – Riat Laban

Syllad | The Rising MeghalayaMay 7, 2021

Ki paid nongshnong shnong ka dong Rat Laban Kynjat Phutbol mynta ka sngi Thohdieng, ki la mih shakhmat daka la ka jong kamon sngewbha ban pyndep ia ka jingai i aka dawai Tika Covid 19.

Ka jingai ia kane ka tika la pynlong ha iing skul Umkynrut LP School da ki nongtei ki nongtrei ka tnat ka koit ka khiah ka Laban Dispensary.

Ka jingai ia kane ka dawai tika ka long tang naka bynta kito kiba la don ha ka rta kaba 45 snem shaneng haduh kiba la kynjoh ia ka rta kaba 80 snem shaneng bad haba kyllum ki paid kiba la ioh ba kin ai baroh ki long 90 ngut.

Shwa ban pynlong ia kane ka jingai ia kaneka dawai tika, ki nongkit kam ka dorbar shnong ki la leit ban rung man la ki thliew ban ialap bad wer bad ban pynsngewthuh ia ki paid nongshnong bad ban pyntip ba na ka liang ka tnat ka kot ka khiah bad kumjuh d aka dorbar shnong, ia kaneka jingwan ban ai ia ka tika ha la ka jong ka shnong, kaba da kylla ka long kaba seisoh, hadien ba ka jingmih paidbah ruh lah ban ong ba ka la pynhun ia baroh, katno tam lei lei ba ka jylla bad khamtam ka nongbah Shillong, khlieh la ka sngi, ka jingdon ki briew kiba ioh kem ia kane ka jingpang ka iai kiew sted bha.

Kiba bun na ki briew kiba wan ban ai ia kane ka tika, ki pynpaw ia ka jingsngewnguh ia ki briew ka tnat ka koit ka khiah bad ia ki nongkit kam ka shnong kiba la kitkhia ban pynurlong ia kane ka sngi ban ai tika ha la ka jong ka shnong.

Nalor katta ki nongwan ai tika, ki kyntu bad wer lem ia ki para nongshnong ka jylla ba kim deiban don kano kano ka jingartatien ne khoh nioh mynsiem,hynrei ba kin ia mih shakhmat sha man la ki jaka kiba ka sorkar ka la buh ia ki jaka kyrpang ban ai iaka tika, kaba long kum ka thma iakhun kaban lah ban jop ia ka jingiakhun ia kane ka khlam jingpang ba la wan ba kan sar ha ka sien kaba ar ha baroh satlak jong ka pyrthei, ka ri bad kumjuh ha kane ka jylla.