Wan u Ratan Dhar haka kyrdan ba nyngkong haka Ladakh Marathon

Syllad | The Rising MeghalayaSeptember 17, 2024

U Ratan Dhar 69 snem rta uba shong ba sah ha Quinton Road, Shillong la lah ban kynjoh ia ka  kyrdan kaba nyngkong ha ka jingleit ban iashim bynta ha ka jingiakob mareh thong kaba jwat na kiba jwat tam ha ka ri, katta ka ‘Ladakh Marathon’ kaba la long ha ka 8 tarik Nailur, 2024, ha kaba u la iashim bynta ha ka iakob mareh kaba 21K.

U Ratan u la iashim bynta ha ka kyrdan ia mareh kiba 60 snem shaneng, ha kaba u la lah ba un pyndep ia ka thong ha ka 2 kynta 33 minit bad 8 sekhon. Ha kane ka jingleit iashim bynta la don ruh kiwei ki nongiamareh na kane ka jylla kiba la leit ban iashim bynta, hynrei u Ratan marwei u la long u nongiashim bynta ba la lah ban kynjoh sha ka thong jong ka jingjop.

Na ka liang u Ratan u iathuh ba u la shim ia ka kam ia mareh kum kawei na ka kam ha ka jingim, kaba u la sdang mynta la 30 snem, ha kaba ka jingthmu ka jong u hi ka long ba da kumno ba un lah ban pynneh ia ka koit ka khiah bad jinglong ba smat bad ba sting jong ka met ha ka jingim jong u.

Naduh ba u shim ia ka kam mareh, u don bun ngut ki paralok ba smat ia mareh, kiba dei lyngba jong ki, ba ka pynlong ia u ban nangsngewtynnad ban iai minot ha kaba iadei bad ka kam ia mareh. Kane ka la ktik pat ia u ban poi ishim bynta ha kiba bun ki marathon ha kaba u la pynpaw ba u la iashim bynta ruh ha ka sien ba nyngkong jong ka ‘Sohra Marathon.’

Kiwei pat ki jingiakob ia mareh kiba u Ratan u la poi ban iashim bynta ka kynthup ia ka Mumbai Marathon, Bangalore Marathon, Goa Marathon, Kolkata Marathon, Olympic Day Run ba juh pynlong man la u snem da ka Meghalaya State Olympic Association, Independence Day Marathon bad ka marathon ba pynlong da ki shipai ka Assam Rifles.

Haba batai sha ka jingleit iashim bynta sha ka Ladakh Marathoin, u Ratan u iathuh ba u la hap ban leit sah lypa bun bun sngi sha kane ka jaka, namar ba dei ka jaka kaba don ha jaka kaba kynjang ne ka high altitude, kaba donkam bha ia ki briew kiba shong ba sah kham ha them ba kin pynmlien lypa ia la ka jong ka met bad ka suin bneng ruh ka long kaba khriat shibun.

Nalor kata u la iathuh ruh ba bun ki nongiashim bynta kim lah ban pyndep ia ka thong ba ki iakhun namar ki shem jingeh bha kaba bunsien hap ban pynkit noh ia ki da ki ambulance.

Shuh shuh u la iathuh ba u la dep ban ai ruh ia la ka jong ka kyrteng ban iahsim bynta ha ka ‘3rd Sohra International half Marathon’ kaban long ha ka 21 tarik mynta u bnai.