Wanphai 85 ngut ki nong Meghalaya na Manipur

Syllad | The Rising MeghalayaMay 5, 2023

85 ngut ki nong Meghalaya kila wanphai noh sha Jylla na Manipur hadien ba nang jur ka jingklumar ha Manipur haka sngi Thohdieng.

Kine ki 85 ngut ki kynthup ia 50 ngut ki samla pule na Agriculture University, 10 ngut na Food Technology Institute, 25 ngut ki nongialehkai football ka kynhun Lajong, bad kiwei kiwei.

Ka sorkar Jylla kala pynbiang ia ki liengsuin ba kyrpang, ban shaw ia ki khynnah pule bad ki nongshong shnong ka jylla Meghalaya na Manipur.

Ka jylla Meghalaya, ha ryngkat ka jingiatreilng bad ka PMO, ka Ministry of Home Affairs, DG Assam Rifles, ka Ministry of Civil Aviation, bad ki private airlines, ki dang ialeh katba lah ban pyntikna ban wan ialam iaki  nongshong shnong ka jylla.

Ka khubor ka iathuh ba palat 25 ngut ki nongshong shnong kila wan phai lyngba ka kad liengsuin na Guwahati bad la pynbiang ruh ki bos ban kit iaki 60 ngut ki khynnah bad samla pule ka jylla.

Ka sorkar pyllait paidbah ruh iaki nomber phone ia kino kino kiba donkam jingiarap, ki ba lah ban phone hi ha u nombar 1800-345-3644, bad la bthah ia ki ba donkam jingiarap ba kin ym artatien ban phone lada donkam jingiarap ha kano kano ka rukom. La bthah ruh na ka bynta ki samla pule ka agriculture and food technology ban phone ia u Nodal Officer, bah Remdor Dkhar (+91 98631 14387), Dr. Paul Chyne (+91 9863089972), bad ki lah ruh ban phone lada ki donkam jingtip na ka bynta ki Samla pule medical.

Ka kynhun jong 3 ngut ki dkhot ba lam khmat da ka Dr. Ampareen M Lyngdoh (Minister, Government of Meghalaya), u bah Daniel Thangkiew (Political Secretary & OSD to Chief Minister) bad u Dr. Viveknanda Singh Rathore, IPS (SP, West Garo Hills) ki la leit sha Imphal na ka bynta ban iarap ha ka ban ialam biang ia ki ba dang sahkut. 

U Myntri Rangbah ka Jylla Conrad K Sangma u la ong, “Ngi dang pyrshang katba lah ban wan ialam biang ia ki nongshong shnong ki ba dang sahkut sha Manipur da ki liengsuin na ka bynta kito ki ba kwah ban wan phai sha jylla Meghalaya.”

Ula kyntu iaki samla pule sha Manipur bad ki kmie ki kpa ryngkat ki ba ha iing ha sem ba kin nym rit mynsiem ne syier, ka sorkar pdeng bad ki sorkar jylla ba mar jan, bad kiwei kiwei ban pynbiang baroh ki jingdonkam ban wanphai noh sha jylla.