Wanphai biang ka jingshongshit Behdieñkhlam ha Jowai

Syllad | The Rising MeghalayaJuly 14, 2022

Hadien arsnem bala hap ban sangeh iaka jingshad paidbah na ka daw ka jingwan lyngshop ka khlam ka ngoh COVID-19, mynta u snem ka jingshongshit Behdieñkhlam kala wanphai biang kumba ju long bad la sakhi ba ka Iawmusiang kala dap smam da u paidbah naduh khynnah haduh ki rangbah bad ki kynthei ha ki khor ki khriam kiba itynnad kila shimbynta shitrhem ban shaw iaki dieng khlam kumjuh ruh iaka Symbood Khnong bad Khnong Blai haka sngi Balang.

Mynta ka sngi kadei ka sngi balai jong ka lehniam Behdieñkhlam, ha kaba la pyndep ïaki lehniam bapher bapher kaba la sdang naduh ka por 4 baje mynstep da kaba pynïeng ïaka Deiñkhlam ka Bon ha Ïung Blai jong ki jait Rangad ha Chilliangraij Jowai. Ha kane ka juh ka por la pynïeng ruh ïaka Deiñkhlam ka Doh bad hadien kane pat manla ki thliew ïing ki la pynïeng ïaki Diengkhlam rit ha la ki ïing ki ïing jong ki.

Ki Khonraij (Chilliangraij) ki la leit ban shaw ïaka Symbood Khnong ha ka por 9:30 shiteng na jaka kyntang na Ïawmusiang ban pynïeng ïaka ha Khliehshnong haka dong Chilliangraij.

Haka nohphaisngi da ki hajar ngut ki paidbah kila ïa mih paidbah ban sakhi ïaka jingrah Khnong Blai bad leit buh ïaka sha ka jaka kyntang ha Pohsawiar ban pyndep iaka nguh ka dem.

Hadien ba u Dolloi ka Elaka ula pyndep iaka nguh ka dem ha Pohsawiar ki Khongraij kila rah ïaka Khnong Blai sha madan Moosyiem ka ban pyndep pat da u Kñi ka kur Nikhla bad u Pator.

Ki Kmai Raij ruh kila rah la ki jong ki jong ki diengkhlam ha ryngkat ka kynhoi risa ka shad ka kmen bad ka jingsawa ka bom bad ud ka bhuri bad ka chew chew. Haba la poi hala ki jong ki shnong kila pynieng iaki diengkhlam.

Ka lehniam Behdieñkhlam jong ka Seinraij Jowai kan kut haka 14 tarik Naitung ha Syiem Aitnar.