Wanpoi ka met ba dang sah u samla kiewlum Bah Tiklu Jyrwa

Syllad | The Rising MeghalayaOctober 9, 2022

Ka met kaba dang sah jong u samla kiew lum ka jylla u bah Tiklu Jyrwa ka la wan poi mynta ka janmiet por 8 baje tam eiei, hadien ka jingioh ban sei ia ka na u lum Draupadi Ka Danda II hynnin ka sngi Saitjain.

Iaka met kaba la leit ban ban ithuh bad ban kam ia ka da u kynum trai u bah Tiklu u bah Wallambok K Lyngdoh ba dei artad u General Secretary jong ka Meghalaya Rock Climbing and Sports Mountaineering Association.

U Bah Wallambok u bala mih na la iing naduh ka janmiet jong ka sngi Thohdieng khlem shongthait u la shu don beit tang ha lynti la palat ia ka 48 kynta.

Ia kane ka jingleit ban shimti ia ka met bah Tiklu, la iarap lang ryngkat da ka ophis Deputy Commissioner ka East Khasi Hills District, ha kaba la leit ban shaw kyrpang ruh da ki arngut ki Coaches kiba  trei ha ka ophis jong u District Sports Officer ka East Khasi Hills District, ia kaba la synran lang nakhmat da ki pulit jong ka jylla.

Hapoh iing bah Tiklu shwa baka met kan poi, la dap smam ki paidbah nongwan sngewlem kiba la ap naka bynta ban pdiang sngewlem ia kane ka met.

Hadien kane, naka liang ka Balang Presbyterian ki la shim ia ka bynta ban ai ia ka jingduwai shwa ban pynrung ia ka synduk ba la thep ia ka met jong u bah Tiklu.

Hynrei kaba la pynjaw ummat lang ia baroh kiba la don ha kum kane ka por, dei ka jingiam pait dohnud ka lok kong Indalin Lyngdoh Marshillong kaba hangne u bah Wallambok kum u hymmen u la piam bad kdup ia la ka jong ka para bad syrpai da ki kyntien khroh ia la ka para ba kan hun bad tngen noh ka mynsiem namar ba ha kum kane ka khyllipmat, U Blei um shim la iehnoh hynrei u la bteng ban ialam lynti tad haduh ban da lah ban pynioh wanphai iing ia ka met kaba sah u bah Tiklu.