Wanrah burom u Principal ka Mynken CHSS ia ka Jylla da kaba ioh pdiang ‘National Award’ na ka President ka Ri

Syllad | The Rising MeghalayaSeptember 5, 2024

Ka President ka Ri India, ka Droupadi Murmu haka 5 tarik Nailur ka la sam ïa ki khusnam ‘National Awards’ sha ki nonghikai na kylleng ka Ri ha ka jingïalang rakhe ia ka sngi ki Nonghikai (Teachers’ Day) ha ka Nongbah New Delhi.

Ha kane ka jingsam khusnam u Bah Everlasting Pyngrope, Principal ka Myngken Christian Higher Secondary School, Ri Bhoi District, u la kylla long uwei napdeng kiba la shah pynkup burom ha ka President ka ri da kaba ioh pdiang ia kane ka khusnam National Teachers’ Award’.

U Bah Everlasting u la ioh pdiang ia kane ka khusnam namar ka jingnoh synniang kaba khraw jong u ban kyntiew ha ka liang ka pule puthi bad bad khamtam ban aijingkyrshan ia ki khynnah kiba donkam ia ka jingiarap ba kyrpang.

Kane ka skul Mynken kaba u hikai ka la pyndonkam lyngba ka ICT lyngba ki kor komputor bad smart classroom bad ka jingkyntiew ia ki lad jingpule lyngba ki kor ki bor jingstad ryngkat ka jingiatreilang bad ka Tnad District Social Welfare ban iarap ia kito ki khynnah kiba angnud ban ioh jinghikai.

U Principal ka Myngken Christian Higher Secondary School ua la trei shitom na ka bynta ka jingmyntoi jong ki khynnah skul hapoh ka thain khamtam na ka bynta kito kiba wan na ki longiing kiba kham jynjar bad ki bym kotbor ban bteng ia ki jingpule kiba kham shalor.

Haba kren ha ka jingialang, ka President ka Ri ka la ong ba ki nonghikai ki hap ban pynkhreh ia kiba kum kine ki nongshong shnong kiba ym tang ba ki long kiba la nang lastad hynrei kiba sngewrit, kiba shida bad kiba don ia ka jingthmu kaba bha. Kala ong ruh ba ka jingiaid shakhmat ha ka jingim ka la dei lypa ka jingjop, hynrei ka jingmut jong ka jingim ka shong ruh ha kaba trei na ka bynta ka bha ka miat jong kiwei pat.

Ka la ong ruh ba ki nonghikai ki don ka bynta kaba kongsan tam ha ka jingjop jong kano kano ka rukom hikai. Ka jinghikai kam dei tang ka kam. Ka long ka kam kyntang jong ka jingroi jingpar jong u briew. Lada u khynnah um lah ban leh bha, te ka rukom hikai bad ki nonghikai ki don ka jingkitkhlieh kaba kham khraw.

Ka president ka la  kdew ruh ba bunsien ki nonghikai ki ju pyrkhat kyrpang tang ia kito ki khynnah skul kiba leh bha ha ki exam. Hynrei ka jinglah kaba bha ha ka jingpule ka long tang kawei ka bynta jong ka jingtbit. U khynnah u lah ban long u nongialehkai uba tbit bha; katto katne ki khynnah ki lah ban don ka jingtbit ban long nongialam; uwei pat u khynnah u iashim bynta da ka jingsngewtynnat ha ki kam pynroi imlang sahlang. U nonghikai u hap ban ithuh ia ka sap tynrai jong uwei pa uwei u khynnah bad ban kyntiew ia ka.

Ka tnad pule puthi ka Sorkar Pdeng ka la jied ia 50 ngut ki nonghikai na ka bynta ka jingioh pdiang ia kane ka khusnam  ‘National Teachers’ Awards 2024’. La jied ia kine da ka lynti kaba shai bad lyngba ka online, kata lyngba lai tylli ki bynta kiba kynthup ha ka kyrdan jong ka District, ka Jylla bad ka ri.

Kine ki 50 ngut ki nonghikai kiba la shah jied ki dei na ki 28 tylli ki Jylla, 3 tylli ki UT bad 6 tylli ki Organisation bad napdeng ki 50 ngut ki nonghikai ba la jied, 34 ngut ki dei ki shynrang, 16 ngut ki dei ki kynthei, 2 ngut ki dei kiba duna dkhot met bad 1 ba trei bad ka CWSN.

Nalor kata ka la don ruh ka jingpynkup burom ia ki 16 ngut ki nonghikai na ka Department of Higher Education bad 16 ngut ki nonghikai na ka Ministry of Skill Development and Entrepreneurship.