Wanrah ia ka ain kaba ong khlem Aadhaar phim lah ban thep vote, ong u Adelbert ia ka Sorkar

Syllad | The Rising MeghalayaApril 9, 2025

U MLA ba la shah sospon ka Voice of the People Party (VPP) na North Shillong, u Bah Adelbert Nongrum u la pynbna ba u dei uwei napdeng khyndiat eh ki nongthaw ain kiba la rai ban ym pynrung kyrteng Aadhaar.

Haba pyniasoh bad ka kynhun ba iakhih pyrshah Aadhaar ba la khot pynlong da ka Awaken India Movement (AIM) ha ka 9 tarik Iaiong hakhmat u mot dur jong u Kiang Nangbah ha Barik point, u Bah Adelbert u la ong, “Ngim pyrshah ia ka jingpynrung Aadhaar, hynrei ngi kyntu ia ka Sorkar Jylla ba kam dei satia ban pynbor ia ki paidbah ba kin pynrung kyrteng Aadhaar.”

U la ong ruh ba dei ban pynkynmaw ia ka sorkar ba kim lah ban pynduh ia ka hok jong ki nongshong shnong halor ki jingmyntoi bapher bapher da kaba bynrap, “Kino kino kiba pyrshang ban leh ia kane kin hap ban shim ia ka jingkitkhlieh kaba pura halor ki jingleh jong ki.”

U Bah Adelbert u la ther tyngeh ruh ia ki nongialam sain pyrthei halor ka jingeh kaba mih na katei ka mat bad ong, “Kiba bun na ki kim dei ki nongthaw ain, hynrei ki dei ki nongthaw pisa. Lada pynlong kongsan ia u Aadhaar kumta phi ruh phi dei ban wanrah da ka ain kaba ong khlem Aadhaar phin ym lah ban thep vote.”

U la kyntu ruh ia ki paidbah ba kin leit sha la ki jong ki MDC, MLA bad MP bad ong, “Wat ailad ia ki ba kin thiah, ki dei ban kren pyrshah ia kane ka jingleh ban pynbor ia ki paidbah ban pynrung kyrteng Aadhaar.”

Pynlong jingiakhih ka AIM, shitaiew ai por ia ka Sorkar ban pynsangeh pynbor pynrung Aadhaar

Haba pynkynmaw ia ka jingshah thngan kaba 17 sngi jong u ban pyrshah halor ka jingpyrshang ban knieh noh ia ka bor jong ki Khlieh Nongsynshar Shnong ha u snem 2015, une u MLA ka North Shillong u la ong, “Ha kane ka juh ka jaka (ba pynlong jingiakhih), la tyrwa ia nga T.6 klur da ki briew ki bym lah ban ithuh. Ki la ong ia nga ba nga dei ban sangeh noh ia kane ka jingiakhih, bad ka jubab ka jong nga ia ki ka long ba ka jingsangeh shah thngan ka don tang artylli ki lynti, kata ban pynbor ia u Lat ban ai ka jingmynjur ia ka Village Administration Bill ba la mynjur da ka District Council na ka bynta ban pynkupbor ia ki Khlieh Nongsynshar bad ki jaka treikam tynrai lane ba kin ap sa na ka bynta hynriew sngi ban iohi ia ka metiap jong nga ba la rah na kane ka jaka.”

Une u MLA u la ong ba u la hap ban iaid lyngba ia shibun ki jingshah banbor bad shah niew bein hynrei ha kaba khatduh, kane ka jingiakhih shah thngan jong u kam shym lehnohei namar la pynphai biang ia ka bor sha ki Khlieh Nongsynshar bad ki jaka treikam tynrai, bad kane kan ym jia khlem ka jingkyrshan jong ki paidbah.

Haba phai sha ki por jong ka Khlam Covid, u Bah Adelbert u la kam ba ma u bad ka iing ka sem jong u ki la kyntait ban ai tika wat hapdeng ka jingpynbor kaba jur ia ki nongshong shnong bad ong, “Nga la hap ban iaid lyngba ia shibun ki jingshah kynnoh haba nga dang leit sha iingmane ne ki iing iap briew.”

U la ong ruh ba ha ka jingsngew ka jong u na ka liang ka sorkar kam dei satia ban ialam bakla ia u paidbah halor kiba kum kine kiei kiei.