Wanrah ka JHADC iaka mang tyngka ba duna T.13.15 klur, pynksan u ma Thombor kan pynktik iaki MDC ban jop

Syllad | The Rising MeghalayaMarch 25, 2021

U Chief Executive Member (CEM) jong ka Jaintia Hills Autonomous District Council (JHADC) u ma Thombor Shiwat haka sngi Palei ula wanrah iaka Mang Tyngka jong u snem 2021-22 kaba duna haduh T.13.15 Klur naka jingmang ban iohlum haduh T.173,50,30,000 Klur, katba ka jingmang ban pynlut pat ka long T. 186, 65, 21,300 klur.

“Ka jingheh ka jingheh ka jingpynlut ka dei ka jingheh ka jingsiew iaka tulop iaki nongtrei, ka arrear, ka jingkiew dor ki mar mata bad ka jingduna bad ka jingtlot ka rukom ioh lum khajna ka konsil,” u Ma Shiwat ula iathuh.

Wat la heh ka jingpynlut bad duna ka jingpynmih ka konsil, u CEM ula pynksan da kaba ong ba kane ka jingduna ka jingiohlum pisa kan pynktik ia ki dkhot ne (MDC) ban iatreilang ban jop bad ban pyndap iaka jingduna ka pisa ka konsil.

U Ma Thombor Shiwat haba wanrah ia kane ka mang tyngka ula ong “U snem 2020 u dei u snem u ba baroh ka pyrthei ki mad iaka jingeh hadien ka jingwan sar ka khlam COVID-19. Ka khlam COVID-19 ym tang ba ka wanrah iaka jingma haka koit ka khiah, hynrei kala ktah iaka rukom treikam ka konsil kaba la hap ban pynduna ia ki briew ban wan trei haduh 30 percent haduh u bnai Naiwieng 2020 bala shah ban wan trei 100 percent ka rukom wan trei.”

“Ka jingkhang dam kala pynthud ia rukom pyntreikam ia ki skhim bapher bapher hapoh ka konsi, hynrei mar sien plie ka jingkhang dam la sdang iaid shait shait,” ula ong u ma Shiwat bad ula iathuh ruh ba ka konsil kala shna iaka Additional Office Building.  

Ha kaba iadei bad ka iarong tyngka ka konsil, ula ong ba kam don kano kano ban burieh namar b aka konsil ka don hapdeng ka jinghiran pisa bad kam lah satia ban siew iaka tulop ki ki dkhot ne MDC, nongtrei kaba kynthup iaka pensions jong ki dkhot barim bad ka pension jong ki nongtrei ka konsil.

Ula ong ruh ba ka Executive Committee kala shimkhia bha bad la iakren ruh bun bun sien bad ka sorkar ha kaba iadei bad ka bhah baka konsil ka dei ban ioh.

Ula iathuh ruh ba ka sorkar Jylla kala lah ban pyllait iaka bhah jong ki na ka Major Mineral T. 42,48 , 09, 158 klur, Minor Mineral T. 7,28,52,645 klur bad na kla khajna Taxes on Motor Vehicles T. 8,57,70,952 klur.

Na kane ka pisa la ioh ban siew iaka tulop ki MDC, nongtrei bad ka pension jong ki nongtrei bad dkhot n aka bynta 8 bnai naduh u Risaw 2019 haduh u Jymmang 2020.

Shuh shuh u ma Thombor ula ong ba kila lah ruh ban siew iaka ram jong ka tnad CWD kaba la shim ha u snem 2019-20 bad kaba sah kalong T.7 klur naka T.14 Klur.

Ha kaba iadei bad ka jingjop ka konsil, u ma Thombor ula ong ba ki kam baka JHADC wat hadpeng ka jingkhangdam kadei ka jinglah ban thaw iaka JHADC Forest Policy, ka jinglah ban buh ryntih iaka jingkhein jingdiah (annual accounts) jong u snem 2017-18 kaba la submit ruh sha ka thad AG, Shillong.

Kawei pat ka kam ka dei ka jinglah ban wanrah iaka dak thoh Pnar.