Wanrah nam burom u khynnah na ka longïing ba hiran ka ioh ka kot naka jingkhang jingtih dewiong

Syllad | The Rising MeghalayaMay 9, 2019

JOWAI: U Kamphereiei Pala uba na ka shnong Moolamylliang, East Jaiñtia Hills District ula wanrah ka nam ka burom jong ka skul North Liberty Higher Secondary School bad ka ïing ka sem jong u hadien ba ula rung haka thup First Ten Position bad wan haka kyrdan kaba phra haka Higher Secondary School Leaving Certificate (HSSLC) (Science) jong ka Meghalaya Board of School Education (MBOSE) haka resol kaba pynbna haka sngi Balang.

U Kamphereiei u dei u khun jong ka Kong Kratis Pala bad u Ma Emle Pachiang. U Kamphereiei ula pyndep ïaka matrik jong u na Tluh Secondary School, hynrei hadien ka jingkhangtih dewiong une u khynnah ula jan ban pep skul namar ba hiran ka ïoh ka kot jong ki kmie ki kpa jong u, kiba im ja da kaba bylla tih dewiong.

Hynrei ki katto katne ki nongshong shnong ka Moolamylliang bad kiba haiing ka kila wan mih ha Principal ka North Liberty Higher Secondary u Richard B Uriah ban kyrpad ban ailad ïa u ban rung klas ha kane ka skul.

U Ma Richard ruh hadien ba ïohi ïaka resol ba bha une u khynnah haka matrik ula pynrung klas ïa u bad bei pisa ïa u Kamphereiei na ka bynta jinglut jingsep baroh haka kyrdan 11 bad 12.

Ka khubor kaba sngewtynnad kalong ba u Kamphereiei wat hadpeng ka jingduk ka jingkyrduh ka iing ka sem hadien ka jingkhang tih dewiong ha ka Jylla kam shym la khanglad ïa u ban poi ha kane ka kyrdan.

“Ka daw ba nga poi haduh kane ka kyrdan ka dei ka jingdon ryngkat U Blei haka jingim jong nga bad ka jingkyrshan ka skul North Liberty HSS ïa nga khamtam u Principal ka skul u Richard B Uriah uba don ka mynsiem ba kylluid ban ïarap ïa kiba duk bad nga ïohlad ban bteng ïaka jingpule khlem da hap ban siew eiei ban leit skul ha kane ka skul ar snem,” la ong Kamphereiei bad ai khublei ïa baroh ki nonghikai, ki nongtrei ka skul kiba ai mynsiem ïa ki khynnah skul ban minot haka pule ka puthi.

Haba kylli kaei ka khubor kaba u kwah ban ai sha ki para khynnah skul, ula jubab ba “Lada ngi minot haka pule ka puthi, ka jingduk ka jingkyrduh kam lah ban khanglad ba ngin poi sha ka thong kaba ngi thmu bad ka donkam ïa ngi ban sumar syndong tang ka akor ka burom haka jingim kum ha kine ki sngi ba jur bha ka jingtynjuh kum haka jingialuh samla haka rta kaba dangrit bad ka jingpyndonkam bakla iaka technology ne ka internet.”

“Ngam ong ba ka technology ka sniew, hynrei ha kine ki sngi kum ki khynnah skul ngi dei ban nang ban pyndonkam iaka technology ban myntoi haka kam pule puthi namar ba ka bunsien  ka juk internet ka khring ïa ngi sha ki kam pynbyrngia kaba pynsepei ïaka por pule puthi jong ngi,” la ong u Kamphereiei.

Une u khynnah u angnud ban pule Doktor bad u kyrmen ba u pass ïaka entrance jong ka NEET.

Ka North Liberty HSS, Jowai wat la ka dei ka batch kaba nyngkong haka Science stream kala leh bha ha kaba baroh 30 ngut ki khynnah kiba ïakhun iaka exam kila pass haka 1st division lait noh tang uwei uba wan haka kyrdan 2nd Divison haryngkat ki distinction haki sobjek bapher.

Uwei pat u khynnah skul ka North Liberty HSS, u Berennice Anerict Tang, uba sah Dongmihsngi Ladthadlaboh, Jowai ula wan haka kyrdan balai.

Baroh lai ngut ki khynnah pule na Rilum Jaiñtia ba kynthup ïa u Khroo Meda Dkhar u khynnah skul jong ka KJP Synod Mihngi Hr Sec School, Jowai uba shong ba sah ha Chilliangraij ula wan haka kyrdan kaba hynriew ki angnud ban pule doktor.