Wanrah takma ka Lamerphylla ia ka India ha ka International Karate Tournament

Syllad | The Rising MeghalayaJuly 1, 2024

Ka Samla Lamerphylla Damesha Kharsati ka la wanrah ia ka nam ka burom ym tang ia ka Jylla hynrei ia ka Ri India hi baroh kawei lyngba ka jingjop ia ka takma rnong ha ka 23rd Milo Open International Karate Tournament kaba la long ha Kuala Lumpur, Malaysia.

Haba ia aireng ha ka hapdeng ki kynthei kiba ha ka jingkhia kaba 68 kilo ha ka ‘Kumite’ ka Lamerphylla ka la lah ban pynpaw ia ka sap bad ka jingkut jingmut ha baroh kawei ka tournament ba la pynlong hapoh Titiwangsa Indoor Stadium naduh ka 26 haduh ka 30 tarik Jylliew 2024.

Kane ka jingjop kaba ka Lamerphylla ka la ioh pdiang ha kane ka jingiakop kaba mar iareng bha ka pynpaw halor ka jingtrei shitom ka jong ka khamtam ha kine ki bnai kiba la dep bad halor ka jingkut jingmut kaba skhem jong ka.

Da kaba ioh khur ia ka takma rnong ha kane ka jingiakop, kane ym tang ba ka la wanrah ia ka burom ia ka Jylla bad ka ri India hynrei ka pynpaw ruh halor ka kabu bad ki jingjop kiba kan dang iai bteng ban ioh pdiang lyngba ka jingbteng ia ka jingai jingkyrshan bad ki lad jingiarap.

“Ban ia aireng ha ki rynsan iakop jong ki ri ka pyrthei bad ban ioh pdiang takma ka dei ka sienjam kaba kongsan tam ha ka jingim jong nga. Nga sngewnguh shibun halor ka lad ka kabu ban ioh mihkhmat ia ka India bad ngan iai bteng ban trei shitom na k bynta ki jingiakop kiba hadien habud,” ong ka Lamerphylla hadien ba ka la ioh ia kane ka jingjop.