Wanrah noh ïa ki jingthoh shaphang ka thma Jaiñtia 1862 sha ka jylla: Prof SN Lamare

Syllad | The Rising MeghalayaDecember 30, 2021

U Professor SN Lamare haba kren kum u nongkren ba pawkhmat haka lyngkhuh sngi ïap ba 159 snem U Kiang Nangbah, ula phai khmat sha ki samla bad kyntu ïa ki ban nangwad bniah shaphang ka jingïaleh ki nong Jaiñtia pyrshah ïa ka sorkar phareng.

U Professor Lamare u dei u nonghikai ka tnat pule History haka skulbah North Eastern Hills University (NEHU). Ula thoh shibun tylli ki kot shaphang ka hima bad ka kolshor ki Jaiñtia bad kumjuh ruh shaphang ka jingïaleh ki Jaiñtia pyrshah ïa ka sorkar Phareng.

Haba kren shuh shuh haka jingrakhe iaka lyngkhuh sngi iap U Kiang Nangbah kaba la pynlong da ka Seiñraij Jowai ha Loompyrdi Iongpiah haka sngi Palei, u Professor Lamare ula ong ba ki dang don shibun kiba dei ban thoh shaphang kane ka thma kaba ki heh shipai phareng ki khot ka “Little War” bad u kyntu ruh ïa ka sorkar ban wan rah noh ïa ki jingthoh bala buh kyrpang shaphang ka thma ïaleh pyrshah U Kiang Nangbah sha ka jylla.

U Prof. Lamare uba ïalade ula ngam jylliew bha shaphang ka ri Jaiñtia bad ka jingïaleh pyrshah jong ki ula ong ba ki jingthoh ka sorkar phareng ki don mynta ha ka National Archive ha Delhi bad kumjuh ruh ha ka Regional Archive kaba don ha Kolkata, West Bengal. Kumta u kyntu ïa ka sorkar ba kan wan rah noh ïa kitei ki jingthoh kiba shu buh kyndong kiba lehse kiwei pat kim donkam, hynrei ki dei ki spahbah ïa ngi.

Shuh shuh u ong ba lada kine ki jingthoh kin don hajan, kan pynsuk ïa ki samla bad ki riewwad bniah ban trei ïala ka jong ka kam.

U Prof. Lamare ula pynkynmaw ruh ba wat la ka sorkar Bilat kala ïoh kurup ïaka hima Jaiñtia haka snem 1835, hynrei u syiem Jañtia kila ïaleh pyrshah nyngkong ïa ki Phareng naduh ka snem 1774 kaba mut hashwa ba ki nong America kin sdang ïaka thma laitluid jong ki pyrshah ïaka sorkar Bilat. U Lamare ula ong ruh ba hakum kane ka sngi ngi dei ban kynmaw ruh ïa kiwei pat ki riewïaleh jong ka than kiba la pha ïala ka jong ka jingim kaba kynthup ïa ki kynthei bad ki samla ruh. Shuh ula ong ba ka thma ki nong Jañtia pyrshah ïa ka sorkar ka khlem kut hadien ka jingsdieng phasi ki Phareng ïa u Kiang Nangbah, hynrei hadien jong u ïaka jingïaleh pyrshah la ïalam da u Myllon uba long u Daloi ka eleka Mynso.

U Bah FR Kharkongor, Chief Electoral Officer bad Commissioner Secretary ka tnad Arts and Culture haba kren kum u symbud kongsan ula ong na kaliang ka tnad kan shimkhia ban leh iaka ba donkam iaka jingong u Prof SN Lamare, bad ula kyntu ruh ban ai da ka jingthoh khnang ba ka sorkar kan suk ban buddien bad ban pan ia ki jingthoh shaphang u Kiang Nangbah ban pynsuk iaki nongwad bniah.

“Ngi dang donkam wad bniah shuh shuh shaphang U Kiang Nangbah bad ka jingleh jong ka Seiñraij Jowai ruh kala biang ba kala lah ban pynmih iaka kot, hynrei ka dang donkam shibun ban thoh shaphang U Kiang Nangbah,” la ong Bah Kharkongor bad ula bynrap ba “Wat haka liang ka digital repository ne ka digital library ngi la donkam ban don kaban ailad ia kiba bun ki samla pule bad ki nongwad bniah ban wad jingtip bad ban synniang iaki jingtip shaphang U Kiang Nangbah lyngba ka kor internet.”

U Kyrmen Shylla myntri sorkar haba kren kum u kongsan ula ong ka jingioh laitluid jong ngi ka dei ka jinglen lade u Kiang Nangbah naka bynta ka ri bad Jaitbynriew da kaba ialeh pyrshah iaka sorkar phareng halor ka jingiuhroit jong ka iaka riti ka dustur jong ngi. Une u Khlawait ula ieng ialeh naka bynta jong ngi kaba ka pateng mynta kala ioh iaka jinglaitluid.

“Ha kane ka juk kaba mynta ngi ialeh para ma ngi khamtam haki khubor paidbah (Social Media), hynrei lada phi iohi iaka jingbakla jong kiwei ym dei ban thew ban woh, hynrei ban pynbeit bad ai jingmut khnang ban tei iaka imlang ka sahlang bad ka jaitbynriew,” la ong u ma Kyrmen.

Kiwei kiwei kba kren ki kynthup ia u ma OR Shallam president Seinraij Jowai uba la ai iaka jingkren pdiang kumjuh ka jingkren maitphang, u Dolloi Elaka Jowai ma Puramon Kynjing haka jingiadonlang u MDC Jowai Central Ma Awhai Andrew Shullai, u Arwotki Sumer General Secretary Seinraij Jowai bad kiwei kiwei.

Shuh Shuh haka prorkam ha Madan Madiah Kmaiblai, ka Kiang Nangbah Iasiat Khnam Memorial Society (KNIKMS) kala rakhe iaka lyngkhuh snem U Kiang Nangbah da ka jingiatreilang bad ka bor synshar district kum shibynta ka jingrakhe iaka jingioh laitluid ba 75 sem ka Ri kaba la tip kum ka Azadi ka Amrit Mahotsav bad ka jingdap 50 snem ka jingioh jylla ba pura ka Jylla Meghalaya

Iaka jingialang la pyniaid da u Deputy Commissioner West Jaintia Hills District Garod LSN Dykes ha kaba u ma Kyrmen Shylla ula long kum u kongsan, u Saron Paswet MDC Jowai South kum u symbud kongsan u Dolloi Elaka Nangbah RM Garod u president KNIKMS u ma Pearlet Toi bad kiwei kiwei.

La sam iaki khunsam sha ki nongjop ha ki jingiakop bapher bapher kaba la pynlong da ka Women’s Welfare Organization, Seinraij Jowai, Khynroo Khyllood Committee (KKC) Seinraij Jowai, KNIKMS.