Wanrah surok four lane, sa pyntreikam FASTag ong ka KSU bad FKJGP

Syllad | The Rising MeghalayaFebruary 17, 2021

Wanrah shwa da ka surok Fourlane, shna ïaki side drain kiba paka bad kiwei kiwei ki jingdonkam jong ka surok bad hadien yn iakren pyntreikam iaka FASTag ong ka Khasi Students’ Union bad ka Federation of Khasi Jaintia and Garo People’s (FKJGP)

Ïa kane la dawa kine ki ar seng haka jingiakynduh bad u Deputy Commissioner jong ka West Jaintia Hills District ha kamra treikam jong u haka sngi ba Ar hadien ka jinghuri hura bad ka jingsah kut kali ha Ialong na ka daw ba pyntreikam FASTag.

Haba ïakren bad ki nongthoh khubor hadien ka jingiakynduh, kine ki arseng ki la ïathuh ba ki la ïoh ïaka jingujor na kiba bun balang halor ka jingshim khajna jong ka National Highway Authority of India lyngba ka tnad Ministry of Roads & Transport Department jong ka sorkar pdeng.

“Kane ka jingshim khajna ka la ktah jur ïa u paidbah khamtam ba ka jingmih syndet ïaka jingpynbna (Notification) da ka sorkar Jylla ba baroh ki kali ba ïaid lyngba ki Tollgate kidei ban don ïaka Fastag bad kane ka la pynklumar jingmut ïa u paidbah khamtam ba nangno bad lano yn ïoh ïaki Fastag”, la ong u President ka KSU u Ohibait Dkhar.

Haba ïadei bad kane utei u nongïalam seng ula dawa na ki bor ba dei peit ban pynjynsur ïa kane ka kam khnang ba kan nym mih kano kano ka jingklumar ïa uba bun ba lang.

Ula pynpaw ruh ka jingphylla ba naduh ba la dep pynmih ïaka notification ka jingshim khajna jong ki tollgate ka la kiew arshah ïa kaba juh shim mynshwa.

“Ngim nym lah ban pdiang ïa kane ka rukom shim khajna jong ki Toll Plaza bad ngi dawa jur ba kino kino ki Tollgate/Toll Plaza kidei ban buh shwa ïa kawei ka lane kumba juh buh mynshwa na ka bynta ki paidbah ki bym pat dep register ïa kita ki Fastag kumba la bthah da ka sorkar Jylla ym ban shu shim da kaba kin hap ban siew arshah ïa kaba juh siew mynshwa” la ong u Chief Organising Secretary ka FKJGP u DS War.

Kine ki arseng ki la dawa ruh na ka bor District ba kan bthah ïaka NHAI ba baroh ki kali local kimdei ban siew khajna haki Toll Plaza ba don ha Ïalong West Jaintia bad kumjuh ha Lumshnong East Jiantia namar katkum ki kyndon, kino kino ki Toll Plaza kiba lah ban lum khajna kidei ban dep ban shna ïaka Fourlane Road.

“Wanrah shwa ïaka Fourlane Road, shna ïaki side drain kiba paka bad kiwei kiwei ki jingdonkam jong ka surok bad yn sa ïakren pat ïa kata ka jingsiew khajna ne register ïa kata ka Fastag ha kitei ki artylli ki Toll Plaza”, la ong u President ka FKJGP u Tuesday Lytep.