Wanrah u CEM ka JHADC ia ka mang tyngka ba duna T. 11.32 klur

Syllad | The Rising MeghalayaMarch 27, 2025

U Chief Executive Member (CEM) ka Jaintia Hills Autonomous District Council (JHADC), u Bah Thombor Shiwat ha ka 26 tarik Lber u la wanrah ia ka mang tyngka kaba duna T.11.32 klur na ka bynta u snem 2025-26.

Ha ka jingkren halor ka mang tyngka u CEM u la ong, “Na ka bynta une u snem mang tyngka 2025-26 la antad ba ka jingioh lum pisa kan kot sha ka T.245,90,55,900 klur, katba ka jingpynkut la antad ba kan kot sha ka T.257,23,44,200 klur kaba pyni ia ka jingduna kaba T.11,32,88,300 klur.

Nalor kata u CEM u la batai ruh ba ha kane ka mang tyngka kaba mynta ka Council ka la lah ban pynkhuid noh ia ki jingsiew kiba 15 bnai kiba kynthup ia ki tulop bad allowance hadien ka jingpyllait jong ka sorkar Jylla ia ka song pisa ha u bnai Kyllalyngkot 2025. U la kdew ruh ba 80% na ki arrear jong ka revised pay la lah ban siew na la ka jong ka song pisa ne ka Council own fund.

Haba pynpaw halor ki jingpyntrei ia ki kam pynroi, u Bah Thombor Shiwat u pyntip ba hapoh jong ka Digital India Land Records Modernization Programme (DILRMP), ka Council ka la ioh T.6.32 lak ha u snem 2024-25. U la ong ruh ba na ka tied bad untied grants ka Council ka la pyntrei ia ki 422 tylli ki skhim ha ki bynta bapher bapher jong ka East bad West Jaintia Hills, kata kaba kynthup ha kaba shna ia ki surok, ka jingsam umbam umdih, ki jingker kynroi, jingsam ia ki tin sop iing bad kiwei kiwei.

Ha kajuh ka por u CEM u la ai ruh ka jingiaroh ia ka Executive Committee barim halor ka jingtrei borbah khamtam ha kaba iadei bad ka jingpyndep ia ka Jaintia Dorbar Hall ia kaba la plie ha u bnai Risaw 2024 wat hapdeng ka jingduna pisa. U la kren ruh halor ki jingpynkylla ha ka rukom treikam kum ka rai ba la shim ha ka 28 tarik Naitung 2020 kaba la iarap shibun ia ka Council ban pynduna ha kaba iadei bad ka jingdon ki nongtrei jong ka Council khnang ban ym ban khia ha kaba iadei bad ki jingpynlut.

U CEM u la kyntu ruh ia baroh ki dkhot ba kin ai ka jingiatreilang na ka bynta ka bha ka miat bad ka bit ka biang jong ki paidbah nongshong shnong ka Rilum Jaintia, kata da kaba pynskhem ruh halor ka jingkut jingmut jong ka Council ban wanrah ia ka synshar khadar kaba bha bad ka jingiatreilang kaba jan bad ka sorkarJylla.