Wanrah u CEM ka JHADC ia ka Mangtyngka ba duna T.13.59 klur na ka bynta u 2024-25

Syllad | The Rising MeghalayaMarch 7, 2024

U Chief Executive Member (CEM) ka Jaintia Hills Autonomous District Council (JHADC) u Ma Thombor Shiwat haka 7 tarik Lber, u la wanrah ia ka Mang Tyngka kaba duna T. 13,59,36,800 na ka bynta u snem 2024-2025.

Haba kren ha ka Dorbar Mangtyngka jong ka Council, u Ma Shiwat u la ong ba ka jingioh lum khajna na ki jingdon jingem jong ka Council ka long T.29,38,23,800 bad na ka bhah lyngba ka khajna ka Sorkar ka long T.97,50,00,000 bad ki jingiarap pisa lyngba ka Sorkar (Government grants) T. 77,74,99,700.

Kumta ka Mang Tyngka ba la pynkhreh na ka bynta u snem Mang Tyngka 2024-2025 ka long lyngba ka jingioh lum kaba T.  204,63,23,500 na ka jingpynlut kaba T. 218,22,60,300, kata ka Mang Tyngka kaba duna da T. 13,59,36,800,” ong u CEM.

U pyntip ba baroh ka jingioh lum khajna jong ka Council ha u snem Mangtyngka 2022-2023 ka long T.113,62,46,064, kata na baroh ka jingpynlut kaba kot sha ka T.117,81,88,185. Ia ka jingduna kaba T. 4,19,42,121 la lah ban khyllie na kaba tam ha ki snem kiba la dep.

Ha kaba iadei bad une u snem Mangtyngka 2023-2024, u CEM u la ong ba ka Executive Committee lyngba ka jingbteng borbah ka la ioh lum khajna haduh T.  46,63,70,500 na ki marpoh khyndew kiba kongsan bad T. 13,96,86,519 na ki marpoh khyndew kiba rit, katba ki khajna lyngba ki kali ka long da T. 14,50,93,319 ia kiba la ioh lum kat haduh mynta.

“Ka jingbhah ia ka khajna ba la pyllait da ka sorkar Jylla lem bad kiwei pat ki khajna ba la ioh pdiang da ka Council la pyndonkam ha kaba siew ia ki tulop ba dang sahteng jong ki dkhot, ki nongtrei bad ki pensioner jong ka Council, kata nalor ka jingpynphai ia ka ram ba shipor ba la shim na ki Tnat treikam jong ka sorkar nalor kiwei pat ki jingpynlut jong ka ophis,” ong u CEM.

Ha kaba iadei bad ka jingioh pdiang ia ki jingiarap pisa na ka sorkar, lah ban kdew ha kane ka snem Mangtyngka 2023-24, T.17,00,000 la ioh pdiang lyngba ka Land Reform Scheme, katba ki skhim ba la bei da ka Sorkar pdeng ka Council la khmih lynti ba kan ioh pdiang T. 3,54,04,700 kum ka1st Instalment na ka Digital India Land Record Modernisation Programme (DILRMP),” u la bynrap.

Ban shim ia ki sienjem halor kane ka jingduna, u CEM u la ong ba ka Executive Committee ka la shim ia ki sienjam ban pyniar ia ka jingioh lum khajna na ka bynta jong ka Council. Kane kan kynthup halor ka jingwanrah ia ka Jaintia Hills Autonomous District Council (Village and Town Development Council) Bill, 2023. Ia kane ka Bill la wanrah hapoh ka iingdorbar ha ka Dorbar Tlang kaba la long ha ka 9 tarik u Naiwieng 2023, bad ia kane ka juh la phah sha u Lat ka Jylla na ka bynta ban ioh ia ka jingmynjur.

Nalor kata ka Council ka la shim ruh ia ka rai ban thaw ia ka Village and Town Administration Department ka ban khmih halor ka jingpyntreikam ia ka Building Bye Law ka ban iarap ban kyntiew bad pynneh ia ka pla tyngka jong ka Council lyngba ka jingai jingbit na ka bynta ki kam tei iing tei sem bad ki bynta kiba don jingiadei bad kane.

U CEM u pyntip ruh ba lyngba ka Tnat Art & Culture yn pynmih ia ka jingpynbna paidbah khnang ba ki jaka jngohkai kiba la don lypa bad ki kynhun kiba iadon bynta, ki jaka treikam shimet, ki briew kiba thmu ban plie ia ki jaka jngohkai bathymmai ki dei ban ioh ia ka Permission/No Objection Certificate na ka District Council.

Ban bteng ia ka jingaibor bad ki jingtreikam jong ka Revenue Augmentation Committee ia kaba la thaw katkum ka Notification No. JHADC/GENL/15/2023/1, dt. 25.9.2023 ban jurip bad bishar bniah bad ban tyrwa ia baroh ki lad ki lynti ban ithuh ia ki lad pynmih khajna yn lah ban pynurlong na ka bynta ban kyntiew ia ka iarong jong ka Council, kata nalor ki kyndon ba la kdew ia kiba la dep lypa ban pynkhamti sha ka Committee.

Ban pynduna iaka jinglut, ka jingdon ki nongtrei ha une u snem ban wan la pynduna sha ka 1286 naka 1335 bad kiwei kiwei ki jingpynlut pynsep ruh la khate ka konsil.

Nalor kata u CEM u pyntip ba ia ka Annual Accounts jong ka Council la dep ban pynkhreh haduh u snem 2022-2023 bad phah sha ka Principal Accountant General (Audit), Meghalaya Shillong.

Kumjuh na ka bynta ka jingpyniaid ia ki kam ki jam hapoh jong ka Council bad ban pynthikna halor ka jingbud beit ryntih ia ki Rules, Acts, procedure, policy jong ka Council da kawei pa kawei ka Department bad ban kyntiew ia ka jinglah ban pyntreikam bha bad ban iada ia ka Council ha ki jingjia shah thok, ki jingpynsepei ia ki jingdon jingem, ngi la thaw ia ka Internal Audit Section ha une u snem 2023-2024.

“Ka Internal Audit Section ka la sdang ban treikam laitluid naduh u bnai Nailur 2023,” u la ong. Nalor kata ka jingtei ia ka Additional Office building bathymmai jong ka  Jaintia Hills Autonomous District Council la lah ban pyndep bad ia kaba la plie ha ka 5 tarik u Nohprah 2023.

Ha kaba iadei bad ki jingiarap ba la ioh na ka sorkar pdeng, u CEM u la ong ba ha une u snem 2023-2024, ka Council ka la lah ban pyntreikam haduh 363 tylli ki skhim/projek lyngba ka Tied and Untied Grant kaba kynthup ia ki pung umdih, ki jaka pynlang um, ki nala um, check dam, pung dohkha, solar street light, iingskul, community hall, ki painkhana paidbah, ki madan ialehkai, ki lynti iaid footpath, ki jaka saitjain, Ambulance bad kiwei kiwei ha ki bynta bapher bapher jong ka Jaintia Hills District.

Ha kawei pat ka bynta na ka liang u CEM u la pynthikna hapoh ka dorbar ba ka Executive Committee jong u ka don ia ka jingkut jingmut ban ialam ia ka Council ha ka lynti kaba dei bad ban ai ia ka jingshakri kaba khuid bad kaba seisoh na ka bynta ban kyntiew ia ki paidbah nongshong shnong jong ka District hi baroh kawei.