Wanrah u CM ia ka Mang Tyngka ba duna T. 2,029 klur, phaikhmat ban kyntiew ia ka ioh ka kot sha ka 10 billion USD

Syllad | The Rising MeghalayaFebruary 21, 2024

U Myntri Rangbah ka Jylla u Conrad K Sangma haka 21 tarik Rymphang, u la wanrah ia ka Mang Tyngka kaba duna 2,029 klur na ka bynta u snem 2024-25, kaba long kumba 3.83 percent na ka  Gross State Domestic Product (GSDP), kata da kaba phaikhmat kyrpang ruh ban kynjoh sha ka thong kaba 10 billion US Dollar ka jingkiew ha ka ioh ka kot kat haduh u snem 2028.

Baroh ka jingioh lum pisa ka long T. 27,072 klur ha kaba ka jingioh lum ia ka revenue receipt la antad ba kan kot sha ka T. 23,515 klur bad ka capital receipt sha kumba T. 3,557 klur, ong u CM haba kren halor ka Mang Tyngka ba la wanrah hapoh ka iingdorbar thaw ain.

Da kaba pyllait noh ia ka jingshim rai kaba kot sha ka T.3,527 klur, baroh ka jingioh lum pisa la mang ba kan kynjoh sha ka T.23,545 klur, ong u CM da kaba bynrap ruh ba ka jingmang ban pynlut kan kot sha ka T.19,653 klur katba ka capital expenditure kan kot sha ka T. 7,419 klur.

Katkum ka jingpynpaw jong u CM uba khmih ruh ia ka Tnat Pla Tyngka ka jingbuh jingkhein na ka bynta baroh ki jingpynlut kan long T.25,574 klur, kata khlem da kynthup halor ka jingsiew ia ka ram kaba long T.1,498 klur. U la ong ruh ba ka jingsiew ia ka lut na ka bynta u snem 2024-25 la mang ba kan kot sha ka T.1,236 klur bad ka jingsiew ia ki bai bam tymmen kan kot sha ka T.1,865 klur.

“Kumta ruh, Nga wanrah ia ka Mang Tyngka kaba duna T.2,029 klur na ka bynta u snem 2024-25, kaba long kumba 3.83 percent na ka GSDP,” ong u CM.

“Nga kwah ban pynpaw sha baroh ki dkhot jong ka iingdorbar bad sha baroh ki nongshong shnong bad kin kynmaw ba kane ka Mang Tyngka kum ka ‘Mission 10’, kata ka thong ban kynjoh sha ka 10 billion US dollar kat haduh u snem 2028 da kaba pyndonkam iaki 10 tylli jingplie lad bad 10 tylli ki jingkular, kata ka ban ia tyngkhuh ruh ba ka jingdap 10 snem jong ka sorkar MDA,” pynsngew u Conrad.

Nalor kata u CM u la kam ruh ba ka thong jong ka Jylla ka long ban don ha ka thup jong ki shiphew tylli ki jylla ba la kiew  jong ka ri ha ka GDP bad  SDG kat haduh u snem 2032.

“Ka sorkar jong Nga kan pyrshang ia baroh ki sienjam ban pynjurlong ia kane. Katkum ka thong ka Meghalaya kan phaikhmat sha ka thong jong ka ‘Viskit Bharat’ da kaba kyntiew ia ka GDP jong ka sha ka 10 bn US Dollar kat haduh u snem 2028. Kane ka dei ka thong kaba Nga la pynpaw ha u Myntri Rangbahduh ka ri u Narendra Modi shi snem mynta.

U Conrad u la ong ba ka jingiohi ban kyntiew arshah ia ka GSDP bad ban pynlong ia ka Meghalaya ba kan kynjoh sha ka thong kaba 10 bn US Dollar ha ka ioh ka kot  ka dei kaba la pynkhreh lyngba ka GSDP jong u snem 2022-23 kum ka jingsdang, kata ha ka por ba ka GSDP ka jylla ka long T. 42,697 klur lane 5.3 billion US Dollar.

“Ka GSDP na ka bynta u snem 2024-25 la antad ba kan kynjoh sha ka T. 52,973 klur lane 6.6 billion US Dollar. Ka jingkiew kaba man la u snem hapdeng u 2023-25 ka la kynjoh sha ka 11.4%. Kane ka jingkiew ka la nangpynioh mynsiem ia ka jylla ba kan kynjoh sha katei ka thong kaba 10 bn US Dollar ka jingkiew ha ka ioh ka kot,” ong u CM.

U CM u la wanrah ruh ia ka gender budget kaba long T. 5,271 klur na ka bynta u  2024-25, kumjuh ka jingmang ha kaba iadei bad ki sienjam ban iakhun pyrshah ia ki jingkylla ha ka jinglong jingman ha ka suinbeng kaba long T.4,501 klur. U la ong ruh ba ka mang tyngka ban khmih ha kaba iadei bad baroh ki jingtreikam jong ki samla ka long T. 2,853 klur.

Haba shim kyrpang ha kaba iadei bad ka jingkongsan jong ka pule puthi, u CM u la ong, “Nga la mang T.3,539 klur ban pynkhlain ia ka pule puthi, kata kynthup ia ka T.1,335 klur kum ka jingiarap ha kaba iadei bad ka jingsiew ia ki tulop.