Wanrah u Thombor Shiwat ia ka mang tyngka kaba duna haduh T.30 klur

Syllad | The Rising MeghalayaMarch 9, 2023

U Chief Executive Member (CEM) Jaintia Hills Autonomous District Council (JHADC) ma Thombor Shiwat ula wanrah iaka mang tyngka kaba duna haduh 30,60,14,100/- (Lai Phew Klur Hynriew Phew Lakh Khatsaw Hajar Shispah) haka sngi sdang dorbar mang tyngka kaba long haka sngi Palei.

U CEM haba wanrah ia kane ka mang tyngka kaba duna haduh T. 30 klur ka konsil jong u snem 2023-2024, ula ong ka konsil ka mang ban ioh lum pisa ne Estimates Receipt kaba T. 174,59,38,400/- (Shispah Hynniew Phew Saw klur San phew khyndai lakhlai phew phra hajar saw spah. Ka mang ban pynlut ne ka Estimate Expenditures pat kalong Rs. 205,19,52,500/- (Ar spah san klur khat khyndai lakh san phew ar hajar san spah).

U CEM ula ong kane ka jingduna ka mang pisa naka jinglum ka dei na ka jingkyntiew iaka tulop namar annual increment bad Dearness Allowance sha ki nongtrei ka konsil, pensioners bad ka family pensioners ka council.

Kawei pat kadei ka jingpyntreikam iaka pension jong ki dkhot barim, ka konsil kaba la tip kum ka Jaintia Hills Autonomous District Council Members Pension Act, 2019. Ka arrear Revised Pay jong ki Members, employees and pensioners ka Council ki bym shym la lah ban pynlait ha une u snem bad la rah sha ka mang tyngka jong u 2023-24. La mang ruh ban ai ka jingsiew kaba rit sha ki Class II officer ka council.

Shuh shuh ula ong ba kawei pat ka lad ban wad ki lad ban pynjem iaka jingduna ka mang tyngka, ka Executive Committee kan pynrshang ban iakhun iaka khang lad iaka jingtuid ka pisa shabar ka pla tyngka ka konsil da kaba kyntiew iaka jinglum khajna ka Taxation Department da kaba pynthymmai iaka dor jong ki Trading Licence da kaba wanrah iaka jingpynkylla ne amendment iaka Jaintia Hills Autonomous District (Trading by Non-Tribal First Amendment) Rules, 2023.

U CEM ula pynthikna hapoh ka iing dorbar baka Executive Committee kan kyrpad iaka sorkar ban pyllait ruh iaka bhah jong ka konsil na ka khajna Major and Minor Minerals bad Taxes on Motor Vehicle ne u dewiong, mawshun bad kiwei kiwei mar pohkhyndew bad ka khajna na ki kali motor.

Shuh shuh ula iathuh iaka iing dorbar baka jingiohlum pisa ka konsil na baroh ki bynta ba kadei ban ioh ha u snem bala dep 2021-22 kalong T. 70.69 klur bad ka jingpynlut kala kot T 82.66 klur.

“Kane ka jingduna ka dei namar ka jingduna mang pisa naduh ba sdang u snem 2021-22. Ha u snem 2022-23, ka Executive Committee haka katkum ka jingpyrshang jong ka ban lum ban lang iaka khajna kala ioh T.73,18,11,649/- na u Major Minerals bad T.14,65,67,854/- na u Minor Minerals, katba ka khajna na ka  Motor Vehicle haduh mynta ka konsil kam pat ioh,” la ong u CEM ma Thombor

Ka bhah jong ka konsil naka sorkar jylla bad kiwei ki khajna ba ioh lum ka konsil la pyndonkam ban siew iaka tulop bas ah jong ki MDC, nongtrei bad ki pension ka konsil naka bynta 13 bnai naduh Jymmang 2021 haduh u Jymmang 2022, bad ka jingsiew biang iala ram kaba la shim naka tnad Civil Works Department bad kiwei ki jingpynlut ki bym shym la poi pyrkhat,” la ong u CEM.

U CEM ula ong ba wat hapdeng ka jinghiran ka pla tyngka ka konsil da ka jingiatreilang ki nongtrei bad ka Executive committee la lah ban pyndep iaka jingkhein jong u snem 2019-20-2020-21 bad la aiti iaki jingkhein jingdiah sha u Accountant General (Audit) Meghalaya, Shillong.

Ka jingkhein jingdiah kaba dang sha kalong joing u snem 2021-2022 bad yn pyndep ha u Lber 2023

Ka jingshna iaki ar tylli ki iew shimet kata, ka Iaw Muchai Mynsngat bad law hat, Nonglatem kiba hap hapoh Elaka Nartiang ban kyntiew iaka ioh ka kot ki paidbah ka thain

La ioh lum pisa ruh naka tnad Judiciary haka dor kaba thymmai  katkum ka Court Fees Rules, 2019 kaba la ai jingmynjuur da u Lat ka Jylla.

La shna ruh iaka Additional Office Building ka JHADC kaba la jan dep noh mynta.

Ka jingpyntrei iaki skim naka Tied bad Untied Grant kaba la ioh ka konsil ha ki snem kiba la dei bad ki don haduh 234 schemes/projects naduh u Iaiong (April) 2022 haduh Kyllalyngkot (January) 2023 kiba kynthup iaka Drinking Well, School Building, Community Halls, Sanitary Public Toilet, Playground, Foothpath, Washing Platform etc ha ki shnong bapher bapher.