Wat hadien ka jingiakhih paidbah, lap ka KSU Narpuh ba khlem maramot ia ka surok NH-6 kumba la kular

Syllad | The Rising MeghalayaSeptember 13, 2023

Ka Khasi Students’ Union (KSU) Narpuh Circle ka la pynpaw ia ka jingbitar kaba jur ha kaba iadei bad ka jingkular thok jong ka NHAI ban maramot ia ka surok bah NH-6 kaba la jot rathai, kata wat hadien ba la pynlong da ka jingiakhih paidbah ha ha ka 8 tarik u bnai ba la dep hakhmat ka Tollgate, Lumshnong.

Ka KSU hynnin ka sngi ba Ar ka la hiar shaduh sha Ratacherra ban pynlong ka jingleit jurip ia katei ka surok bah NH-6, hynrei ka la shem ba ym shym la don dak ei ei ruh ban maramot ia ka kumba la kular da u Manager Technical ka NHAI u Biswa Jyoti Lahkar uba la pynpaw hakhmat ka KSU ba tang hapoh ka 6 taiew yn pyndep noh ia ka jingmaramot ia kane ka surok.

Na ka liang ka KSU lyngba une u kyrwoh ka la pynpaw ba kane ka dei tang ka jingkular thok ban pynbiej ia ki paidbah namar wat haduh mynta ruh ym shym la iohi ia kita ki puh shilum, JCB, ki Roller Machine ne wat ki nongtrei.

Ka LKSU ka pynpaw ka jingsngewkhia kaba jur namar kumba kalong mynta kane ka surok ka la nangsniew shuh shuh bad kaba la wanrah ka jingshkut kali kaba jut ha ki thain Narpuh bad wanrah shibun ki jingeh ia ki paidbah nongleit nongwan.

Shuh shuh na ka liang ka KSU ka maham ruh ba kane kane ka jinglong jingman jong kane ka surok kan iai sah kumjuh na ka liang ka KSU kan pynlong syndon da ka jingiakhih paidbah khlem da buh por.