Wat khot sngewbha iaka khlam COVID-19, pyllait ia u dewiong 2 lak ton ba mynjur ka National Green Tribunal ong ka JSM, HANM & JNC

Syllad | The Rising MeghalayaMay 10, 2020

Hadien baka sorkar Jylla kala ailad iaki kharkhana dewbilat kiba don ha East Jaintia Hills ban kit dewiong na Assam, kala wanrah ka jingpyrshah kaba jur ha East Jaintia ha kaba naduh ki paidbah, ka synjuk ki nongialam shnong bad ki sengbhalang bapher bapher ruh kila dawa na ka sorkar Meghalaya Democratic Alliance (MDA) ban pyllait noh u dewiong uba la mynjur ka NGT (National Green Tribunal) ban lilam.

Ka NGT naduh u bnai Lber 2020 kala rai ban pyllait 2 lak Metric Tonnes naka 32 lak Metric Tonnes u dewiong ba la dep tih.

Ka Supreme Court naduh ka 3.7.2019 kala weng iaka jingkhang tih dewiong ha jylla bad hukum ban pyllait ne lilam ia u dewiong ba 32 lak metric tonnes uba la dep tih hapoh ka jingpeit ka Coal India Limited.

Une u dewiong bala pyllait 2 lak ton uba don ha kylleng ki district ha Jylla, ha East Jaintia Hills – 75,000 MT, West Khasi Hills – 50,000 MT, South West Khasi Hills – 25,000 MT bad South Garo Hills – 50,000 MT.

Ki sengbhalang ba kynthup iaka Jaintia Students’ Movement (JSM), Ka Hynniewtrep Achik National Movement (HANM) bad ka Jaintia National Council (JNC) kila dawa naka sorkar ban pyllait noh ia une u dewiong ban lilam ha ka jaka ban ailad iaki kharkhana kit dewiong na Assam, kaba la shah lyngshop haka Khlam COVID-19 ban lait na kano kano ka jingeh.

U Leningstar Rymbai, President JSM, ula ong ba lada ka sorkar ka don jingthmu ban iarap ïa u paidbah ha kum kane ka por ka khim ka khait kala dei ban shimkhia mar mar ban pyllait ïa u dewiong bala mynjur ka NGT ban pyllait ban lilam ha baroh kawei ka jylla ban pyndap pynbiang ia kine ki kharkhana dewbilat ban ia kaba ailad ban wan u mar ne u dewiong ban wan na bar jylla.

“Ka jingleh jong kane ka sorkar MDA mynta ka don kaei re kaei sha lyndet bad pynlyngngoh ia uba ba bun balang, kumno kan ailad ia kine ki kharkhana ban kit dewiong na bar jylla haba u dewiong u dang bun byllai ha kane ka Jylla,” la ong u Leningstar bad bynrap ruh la da ka sorkar ka ailad ban pyniaid da u dewiong ba mih Jylla bad tang na East Jaintia Hills uba la shah ban lilam da ka NGT u don haduh 75 hajar metric ton bad une ruh u lah hi ban pyndap dewiong ia kine ki kharkhana dewbilat.

Ula ong shuh shuh ba ka MHA kala pyllait na ka jingpynjari jong ka Lockdown ia shibun jait ki kam ban pynsuk bad iarap ia u paidbah ba duk ban kyrduh ban ioh kamai kajih bad pyndap iaki jingdonkam ha ki iing ki sem jong ki, hynrei kane ka sorkar MDA kaba ialam u Conrad pat ka leh kuman bad leh shilliang khmat ia u paidbah ka Jylla bad pynim tang ia katto katne kiba lah ban wanrah jingmyntoi iaka sorkar ne ia u Chief Minister bad katto katne ki myntri kiba don haka sorkar MDA.

Also Read | Ka sorkar MDA ka pah iaka khlam COVID-19 ong kiba phet na ka NPP

U Shaniahlang Suchen president ka HANM,  ula ong ban jur iaka sorkar Jylla ban kadei ban pyllait noh mar mar ia u dewiong bala mynjur ka NGT ban lilam bad ban pynsangeh mardor ia u dewiong ba wan na bar Jylla khnang ban lah ruh ban iada naka khlam COVID-19.

“Ka jingwan ki trok ki dewiong na bar jylla, khamtam ka Assam kaba la shah sar haka khlam COVID-19 kalah ban wanrah jingma iaka East Jaintia bad Rilum Jaintia baroh kawei lyngba ka nongniah trok bad ki nongbud trok ban pynpur ia une u khniang, kumta ka sorkar lada ka don jingmut ban pyndap dewiong ia kine ki kharkhana ka dei ban pyllait noh mar mar ia u 2 lak metric ton,” la ong u Shaniahlang Suchen.

Shuh shuh ka JNC lyngba u general secretary u Winchester Pala, ula pynpaw ka jingsngewkhia kaba jur halor kane ka jingleh kuman bad lehbymsuidniew ka sorkar ia ka jingud jingnam u paidbah kumjuh ki nongkhaii kiba la mih sha surok ban pyrshah iaka jingkit dewiong na Assam.

“Ka Sorkar jylla ha jaka ban pynkhreh ia ki lad jingiada na ka jingpur arsien ka khlam (second wave) COVID-19 hapoh ka jylla, pynban ka khot sngewbha pat ia u COVID-19 kaba pyllait iaki kharkhana ban kit dewiong na bar jylla. Khlempep kane ka sorkar kan khot sngewbha iaka khlam lyngba ki nongniah trok bad ki nongbud iaki trok,” la ong u Winchester Pala bad pynrem jur iaka sorkar halor kane ka jingleh khlieh shrieh jong ka ban pyllait ia u dewiong ba wan na Assam, uba suba jur u dei u dewiong ba lait tuh na kane ka Jylla bad dei ki mar jong kiba iajan bad kane ka sorkar kaba ialam ka NPP.