Wat pat siew iaka MPGT Tax ong ka WJHTODA

Syllad | The Rising MeghalayaJuly 1, 2020

Ka synjuk ki nongniah bad trai taxi kamai-ka West Jaintia Hills Taxi Owners’ Drivers’ Association (WJHTODA) kala kyntu ia baroh ki trai taxi ba kin sangeh shuwa ban siew iaka tax Megahalaya Passengers and Goods Tax (MPGT) on Motor Vehicles tad haduh ba la dep ban pynbeit iaka rukom siew khajna bad ka ophis u District Transport Officer, West Jaintia Hills District.

U General Secretary WJHTODA, u Wanroy Jones Nongbri ula ong ba katkum ka jingpynbna ka sorkar jylla lyngba ka tnad Transport kala ai bor ia u DTO ban lum iaka tax MPGT naduh 1 tarik Naitung (July) kaba ki ju ioh ban siew shisien 3 bnai, hynrei mynta ki nongtrei katei ka tnad kila shim beit naka bynta shi snem bad kila leit ban iakren bad u DTO, Jowai.

Na kaliang ka WJHTODA kala pynpaw ka jingsngewkhia halor kane namar ba kila shah ktah bha haka kamai kajih hadien ba la pynjari iaka lockdown ha kine ki 3 bnai ban iakhun pyrshah ia u khlam COVID-19. Ka synjuk kala ong ba ki shem jingeh bha ban siew ia kane ka tax ne khajna lada ki hap ban siew baroh shisnem bad kumta kila iakynduh mar mar bad u DTO, uba la pan por 10 sngi ban pynbeit ia kane ka kam.

“Ha kine ki bnai ba don ka lockdown ngi khlem kamai eiei bad ngi shem jingeh bha ban siew ia kane ka khajna bad ngi la kyntu ia u DTO ban peit kano ka rukom siew kaba biang eh ban lait ktah iaka ki trai taxi,” la ong u secretary ka WJHTODA bad ula kyntu ia baroh ki trai taxi ban kin sangeh shuwa ban siew ia kane ka khajna tad haduh bala ai jingtip u DTO da kumwei.