Wat pynbor ïa ngi ban rah suloi, ai ILP ha Meghalaya mih ka sur na ka iaid paidbah ha Jowai

Syllad | The Rising MeghalayaDecember 18, 2019

JOWAI: Wat pynbor ia ngi ban rah suloi, ai ILP iaka Jylla Meghalaya mih ka sur na ka jingiaid paidbah kaba la pynlong da ki saw tylli ki seng ka FKJGP, KSU, JSU bad ka HNYF ha Jowai mynta ka sngi.

Kane ka jingiaid paidbah kaba jai jai kaba la pynkut ha Iawmusiang da ka jingialang paidbah kala ioh ka jingkyrshan jong kiba bun ki sengbhalang naduh ka JYF, All Biate Students’ Association, ki nongshong iew, ka synjuk ki Waheh Shnong Ri Jaintia bad ki nongkyrshan jong ka seng sain hima sima ka Congress bad kiwei kiwei.

Kane ka jingiaid paidbah kala sdang naduh ka lad Kiang Nangbah Government College, Ladthadlaboh, Jowai haduh ha Iawmusiang.

La ïalam khmat da ki nongialam ka ka FKJGP, JSU, KSU bad HNYF kaba don lang naduh u General Secretary ka FKJGP u Dundee C Khongsit, u Tuesday Lytep President FKJGP, Jaintia Hills, u Ohibait Dkhar President KSU Jaintia Hills, Jersom Shylla General Secretary JSU bad kiwei kiwei.

Haba pynkut ïa kane ka jingiaid paidbah la pynlong da ka jingialang ha kaba baroh ki nongkren kila pyrshah jur ïaka Citizenship Act bad dawa ban pyntreikam ïaka ILP bad ka MRSSA ha baroh kawei ka Jylla.

Ki nongkren baroh kila ban jur ïa u paidbah ban long kiba iatylli bad ban pynduh iaka jingsngewpher bad lada ka sorkar kam lah ban pyntreikam ILP ha Jylla la byrthen ba nang pynjur iaka jingiakhih haka jylla.

Ka nongialam jong ka Jowai Traders Association ka kong Robila Mynlliempdah kala ong ba ki nongshong iew bad ki nongkhaii ki kyrshan ïaka jingdawa jong ki sengbhalang ban pyntreikam iaka ILP.

“Ngim kwah ba u nongwei ne u poiwir un wan ban shong shnong ha kane ka ri jong ngi”, la ong ka kong Robila bad kyntu iaki sengbhalang ban iakhih da kaba jai jai.

U Lamsuk Langstang President HNYF, U Jersom Shylla General Secretary JSU, u Ohibait Dkhar President KSU bad u Dundee C Khongsit General Secretary FKJGP Central Body kila dawa jur naka sorkar kmie ban pyntreikam iaka ILP haka jylla bad ban pyllait iaka jylla baroh kawei naka CAA ban pynduh lad iaki poiwir ka niam Hindu, Sikh, Buddhist, Jain, Parsi bad ki Khristan na Bangaldesh, Pakistan bad Afghanistan ban ioh syrnod nongshong shnong ka Ri India.

Kine ki sengbhalang kila rai ban ap ïaka rai kaba mih naka dorbar kyrpang ka jylla lashai ka sngi bad lada ka long pyrshah iaka jingdawa jong ki kin pynjur iaka jingiakhih.

“Ngim kwah baka jylla jong ngi kan long kum ka Tripura ban shah tyllep ha kiwei ki jaidbynriew, ngi dawa naka sorkar ban pynioh ILP bad ban pyllait iaka jylla baroh kawei na ka jingtreikam ka aiñ CAA,” la ong u Dundee.

U Ohibait Dkhar ula ong “U nongwei udei u nongwei, ko nongshong shnong wat ong iaki kiba pli bad ai jaka sah ïaki namar hadien kin puh kylla ia ngi.”

“Ngi dawa ILP namar ba ka jylla jong ngi kadei ka khyrdop ba ioh rung suk u bar ri u poiei….Ko Sorkar! Wat pynbor ia ngi ban rah suloi bad pyntreikam noh ïaka ILP ha Jylla,” ong u Ohibait.