Wat tang shi inchi ka jaka ym ïoh ka Meghalaya ha khappud Assam Meghalaya ong u khliehduh ka Karbi Anglong
KHATKASLA: Wat la ka jylla Meghalaya naka por sha ka por ka pynheh ka tyngam ban pynïoh biang ïaki jaka ba ïaknieh ba shong ba sah ki paid Khasi Pnar ha khappud Meghalaya Assam, hynrei ka Karbi Anglong Autonomous Council (KAAC), Assam kala dep kam trai lut bad kam hok kam nongkynti ia ka jaka haduh Wah Myntang (kaba khot u nong Karbi Umtang) dei u pud u sam jong ka Assam.
Kane kala paw shyna hadien ka jingwan jurip u khliehduh ka Karbi Anglong Autonomous Council (KAAC) haka sngi Saitjain bad ula wan ïuhkjat haduh ha jingkieng Kurelia kaba la shna da ka sorkar Meghalaya ha Wah Myntang.
![](https://www.syllad.com/wp-content/uploads/2024/09/JIT-Vacancy-823x1024.avif)
U Tuliram Ronghang, Chief Executive Member jong ka KAAC ha ryngkat u MP Lok Sabha u Horen Sing Bey, ki MAC ka KAAC, ki DC, SP West Karbi Anglong bad ki paid Karbi kila wan hiar sha ka shnong Khatkasla haduh Wah Myntang da ki phew tylli ki kali ryngkat ka jingpahara jong ki Pulit Assam.
Ka bor synshar District jong ka West Jaiñtia Hills kala hap ban pyndem ha khmat kine ki heh ka KAAC, Assam wat hadien ba kala don ka jingiania bad iasaid hala ka jong ka nongrim haka shnong Khatkasla. Na ka bor synshar district West Jaintia Hills ki don tang arngut ki Magistrate, katba na ka KAAC naduh u Principal Secretary, Secretary ka KAAC, MAC, DC SP kila hiar ban iakren hashuwa ban hiar jurip sha Wah Myntang.
Ka bor synshar district West Jaintia Hills kala pyrshang ban khanglad, hynrei ka kynhun kaba wan bad u CEM ka KAAC kila ong ba u CEM ka KAAC u kwah ban jurip ïa katei ka jaka khappud.
Ki Magistor ka West Jaintia Hills kila ong ba kim lah ban jurip namar ba ka hap haka jaka kaba iaknieh hadpeng ki ar jylla, hynrei ki ophisar ka KAAC kila ong ba kadei ka jaka kaba hap hapoh u pud u ang ka KAAC bad kim lah ban khang iaki bad kim donkam ruh ban pan bor ne pyntip ban leit ban wan haka jaka lajong.
Hadien ka jingiakren la ailad ba kine ki heh ka KAAC kin leit shaduh sha wah Myntang bad la khanglad tang ia u paidbah na baroh ar ki jaidbynriew.
Ha kane ka jingjurip une u khliehduh ka KAAC u Tuliram Ronghang ula ong “Ka Wah Myntang ka hap hapoh u pud u sam ka Assam katkum ka notification jong u snem 1951 bad ka Wah Myntang kaba dei ka natural boundary dei u pud u sam jong ka Assam”.
Shi inchi ka jaka ruh kim dei ban duh bad ban ai sha ka Meghalaya, ka nongkyntur pud, la ong shuh shuh u Khliehduh ka KAAC haba kren haki nongthoh khubor ha jingkieng Kurelia.
Ki katto katne ki dkhot bad nongialam ka Ka Khasi Student Union (KSU) kiba la hiar sha katei ka jaka namar ba ka don ka khubor ba thmu iaid paidbah ka KSA bad ki paidbah Karbi haba lap lap ïa kane ka jingwan ki heh ki hain ka Karbi Anglong kila pynpaw lyngngoh bad ka sngewrem hadien ba ki heh ka KAAC kila kam trai iaka jaka kaba dang dei ban hap haka Jylla.
U Nangaibormi Sutnga uwei na ki nongialam ka KSU ula ong ba ka sorkar Meghalaya kam dei shuh ban kan shu heh tang da ka ktien, hynrei kan pyni da ka kam khnang ba ki paidbah Khasi Pnar ba shong ba sah ha khappud kin ioh ka jingiada bad pynthikna ïaka jinglong nongshong shnong bad trai jaka jong ki.
Karbi wa tuh