Watla ngi biang ki tiar, ngim don briew kiba tbit ban iakhun khlam COVID-19: Mukul Sangma

Syllad | The Rising MeghalayaJune 1, 2021

U Dr Mukul Sangma u nongialam ka liang pyrshah ula ong “Wat lada don makna ki oxygen, ki ventilator bad kiwei kiwei ki tiar sumar, hynrei ngim don pat iaki briew kiba tbit ban peit bad ban pyndonkam ia kine ki tiar ha ki jaka sumar.”

“Kane kadei kawei na ki jingeh kaba ka jylla ka iakynduh ka dei namar ba ka tnad ka koit ka khiah haka jylla kam don satia ïaki briew kiba tbit ba kan buh ha ki jaka sumar bad kin dang hap ban shah hikai ban pyndonkam ia kine ki tiar,” la ong u Dr Mukul Sangma haba wan jurip iaka jingpynkhreh ka West Jaintia Hills District ban iakhun pyrshah iaka khlam COVID-19.

U Dr Mukul Sangma haba wan jurip iaka West Jaintia Hills ula leit jngoh iaka Corona Care kaba la pynkhreh da ka sorkar ha St. Aloysius Hospital, Ummulong bad iaki Community Isolation Centre ne ki jaka set slung shnong ba la pynkhreh da ka Ladthadlaboh bad ka Chilliangraij.

Hadien kane u Dr Mukul Sangma ula hiar jurip iaka Maternal and Child Health Hospital kaba don ha Panaliar, Jowai bad ula jurip ruh iaka oxygen kaba dang sah teng ban pyndep mynta shibnai eiei.

Haba kren shuh shuh ula ong baka don shibun ki jingduna bad jingpynkhreh ka long kaba suki bad hapdeng ka jingbym bit ka bym biang bad ka jingduna ki nongtrei ban iakhun pyrshah iaka khlam COVID-19.

Kane ka jingduna ki jaka sumar kala pynlong ia hospital ha Shillong ban khapngiah bad hap ban shah tynjuh haka khlam COVID-19 na ki case kiba wan na Ri Bhoi bad Ruilum Jaintia ba phiel ka sorkar ban pynkhreh ban pynbit pynbiang iaki jingdonkam iaki tiar ha ki jaka sumar wat la ki jingtei kila don lypa.

U Dr Mukul ula kyntu iaka sorkar ban kyndit na kaba thiah bad ban treishitom ban pynbiang iaki jingdonkam ban iakhun iaka khlam COVID-19 bad ban iada na ka jingwan lyngshop ka khlam haka sien kaba lai.

“Ngan nym ap iaka jingialang jong ki party bapher bapher, hynrei ha kaba iadei bad ka COVID ka sorkar pdeng kala dep pynbna ba kadei ka khlam ne ka National Disaster, kumta ka kamram jong ka sorkar ban leh ia kaba donkam katkum ka ka bor kaba la pynkup katkum ka National Disaster Management Act,” la ong u Dr Mukul Sangma.

Ha kaba iadei bad ka jingai tika COVID-19, u Dr Mukul Sangma ula ther tyngeh iaka sorkar ba duna ka dawai bad kiba ki briew haka rta 18-44 kim lah satia ban pynrung kyrteng ban ioh ai tika lyngba ka online mode.