WED 2023: Da ka iakop thoh slogan bad drawing pynlong ka KSU Narpuh

Syllad | The Rising MeghalayaJune 6, 2023

Kum shi bynta ban iasnohktilang badri satlak ka pyrthei baroh ban rakhe iaka sngi kyrpang pynneh mariang- Ka World Environment Day, ka KSU Narpuh Circle haka sngi Nyngkong ka la pynlong da ka jingiakop thoh Slogan bad Drawing.

Ia kane ka jingiakop la pynlong ha Divine Word Sec. School Lumshnong bad la wan ban iashimbynta da ki 6 tylli ki school kiba don hapoh ka thaiñ Narpuh, kiba kynthup iaka Umkiang Holy Cross Hr. Sec. School, Narpuh Modern Sec. School Umkiang, Christian Sec. School Lumshnong, Divine Word Sec. School Lumshnong, KJP Synod School Thangskai bad Chiehruphi Sec. School.

Ha kane ka jingiakop la jied 4 ngut ki khynnah na kawei ka school. 2 ngut ki ia shim bynta ha ka jingthoh Slogan bad 2 ngut pat ha ka Drawing. Ka phang pdeng ka long “Ban Tyngkai ia ka Meiri – Sawkun kaba long u Thied bah ka Jingim “

Ha shwa ban sdang ka jingiakop thoh bad drawing la don ka jingialang kaba lyngkot ha kaba la ai jingkren da u Fr. Tonio Mathew uba dei u Principal ka Divine Word Sec. School Lumshnong bad kumjuh na u samla Phanuel Tongper uba dei u Environment Secretary ka KSU EJHDU. La ioh ruh ka jingthung dieng katto katne tynrai. La pyniaid ia ka jingialang da bah KS Suchiang President KSU Narpuh Circle bad iaki nongjop yn ai da ki khusnam bad certificate.