Weng jingiakhih ki nongniah trok ka Star Cement

Syllad | The Rising MeghalayaSeptember 21, 2024

Ki nongniah trok kit dewbilat jong ka company Star Cement kila weng noh iaka jingiakhih kaba khlem buh por hadien ba ki bor peit bor pyniaid jong ka company ki kular ban pynurlong iaki jingdawa jong ki hapoh 10 sngi.

Kane ka jingkular jong ka company, ka urlong hadien ka jinghiar jong ki nongialam bad dkhot jong ka VPP na East Jaintia Hills District hapoh ka jingialam jong u Ma Damewanhi Rymbai haka miet 21 tarik Nailur ban iakren bad ki bor pyniaid jong ka company halor ki mat jingdawa jong ki nongniah trok.

Ki nongniah trok jong ka company Star Cement kaba don ha Lumshnong, kila sdang iaka jingiakhih kaba khlem buh buh naduh ka 18 tarik Nailur halor ka jingdawa ban pynneh iaka tulop 30,000 tyngka shi bnai namar ka jingkiew jong ki mar bam mardih.

Kila dawa ba dei ban pynkiew ka bai lynti bad kiwei de ki jinglut na ka bynta ki nongniah jong ki trok 12 tyre na ka 2000 sha ka 2500 tyngka bad naka bynta ki nongniah trok 16 tyre naka 3000 tyngka shaka 4500 tyngka.

“Ngin weng iaka jingiakhih bad ngin ap iaka 10 sngi bad lada ka company kam lah pyndep ia kane ka jingkular ngin bteng biang iaka jingiakhih”, ong ki nongniah trok.