Weng ka dorbar shnong Mukroh iaka rai boycott, pynthikna u DC West Jaintia Hills ban ioh thep vote ki shnong khappud

Syllad | The Rising MeghalayaFebruary 10, 2025

Hadien ka jingpyrshah jong ki jaitbynriew Karbi iaki kyrtong JHADC ban leit ialap elekshon haki jaka kiba ba hap haka jingiaknieh ne dispute area, naka liang ki bor pyniaid District jong ka West Jaiñtia Hills bad West Karbi Anglong kila shimkhia ban pynthikna ba ka Election MDC sha ka JHADC kan long kaba iaid beit iaid ryntih.

Haba iakren bad u DC ka West Jaintia Hills District u AK Singh ula pyntip ba na ka liang ki ar DC bad SP kila iakren na ka por sha ka por ban wanrah iaka shongsuk shongsaiñ.

Ula pyntip ruh ba u Returning Officer ka Barato Mukroh ula hiar sha Umkhyrmi ha kaba ki paidbah kila pyntip bym don ka jingwit jingthut hynrei la khang ban pyndonkam iaki tynghung pynsawa ha katei ka shnong.

U DC ula kyntu iaki kyrtong bad ki paidbah ban pyndonkam iaka surok na Sahsniang Khatkasla, Psiar sha Mowlber.

Haka 21 tarik Rymphang kaba dei ka sngi thep vote la rai ba baroh ki paidbah kin ioh ban wan thep suk iaka vote ka jong ki sha Mukroh bad Saba.

Nalorkata ula pyntip ruh ba la buh iaki Zonal Magistrate bad Sector Officer ban peitngor iaka jinglong jingman ha ryngkat ka jingdonlang ki pulit.

Ula pyntip ruh ba haka 14 tarik mynta u bnai kan don biang ka jingialang Virtual Meeting hapdeng ki ar DC haba iadei bad ka Election MDC khnang ba kan long kaba iaid beit iaid ryntih.

U DC ula pyntip ruh ba mynta ka sngi ka dorbar shnong Mukroh kala weng noh iaka rai sangeh iashim bynta haka jingthep vote ne boycott ia ka MDC elekshon bad kin thep vote haka 21 tarik Rymphang ryngkat ka kyndon ban buh ka sorkar iaka BOP na Zero point.