Weng kam bad jinglong dkhot ka MSSASA ïaki 5 ngut

Syllad | The Rising MeghalayaNovember 10, 2019

SHILLONG: Ka Meghalaya SSA School Association Sengkmie (MSSASA) ka la weng kam ia san ngut ki dkhot jong ka bad ruh ia ka jinglong dkhot jong ki hapoh jong ka Synjuk bad pynduh pyndam  ruh ia ka post Adviser.

Ha ka kyrwoh khubor ba la phah da u bah Tlanwosly Jahrin Publicity Secretary ka MSSASA Sengkmie u la pyntip ba ia katei ka rai la shim da ki Nongkitkam bad ki Executive Members jong baroh ki District bad Block Unit jong ka MSSASA na baroh kawei ka Jylla ha ka General Executive Meeting jong ka Meghalaya SSA School Association Sengkmie kaba la long ha ka 8 tarik mynta u bnai hapoh Khasi National Dorbar Hall Mawkhar Shillong.

Kitei ki san ngut ki dkhot kiba la shah weng kam ki long Vice President Bah S Lyngdoh uba long ruh u Secretary ka MSSASA Mawlai Block Unit, Finance Secretary Bah A Kharbangar uba long ruh u General Secretary ka MSSASA East Khasi Hills District Unit, Bah E Khongjee CEC member uba long ruh u President ka MSSASA East Khasi Hills District Unit, Bah B Dohtdong GEC member uba long ruh u President ka MSSASA Mawlai Block Unit bad u Bah D. Kharbuli CEC Members.

Ha katei ka jingialang hadien ba la iatai sani bha da kawei ka sur baroh ki dkhot ki la shim ruh ia ka rai ban weng ia u Bah HM Marbaniang bad Bah N Marsiangbai kum ki Adviser jong ka Synjuk bad pynduh pyndam noh ia ka post Adviser. Ka jingweng kam bad weng na ka jinglong dkhot ia kitei baroh  na ka Synjuk kadei halor ka nongrim namar ka jingiaid lait jong ki ia ki kyndon ba la don ha ka constitution jong ka Association bad ruh ia ka rai jong ka Central Executive Committee kaba la long ha ka 18 tarik u Nailur mynta u Snem.

Ka jingialang ha katei ka sngi ka la jied ruh ia i bah JJ Lyngkhoi ban shimti kum u Vice President ba thymmai bad ia i bah Manbhabok Kharraswai ban shimti kum u Finance Secretary ba thymmai jong ka MSSASA Sengkmie. La jied ruh ia saw ngut ki dkhot jong ka Synjuk kiba kynthup ia arngut ki Vice President ka Sengkmie u bah Francis Wanniang bad bah JJ Lyngkhoi lem bad u bah Shrenlinus Khriam bad i bah John Elvis Khongsngi ban peit shipor ia ka Unit jong ka Synjuk hapoh East Khasi Hills District Unit katba ym pat dep ban pynlong ia ka jingjied thymmai ia ki Nongkitkam  jong ka Unit. La rai ruh ba ka Synjuk kan don ia u Legal Adviser bad la jied ia i Bah Daniel Stone Lyngdoh Nonglait nongiasait Ain jong ka Supreme Court ka Ri India ban long u Legal Adviser jong ka Synjuk.

Kumjuh ruh ka Synjuk lyngba kane ka kyrwoh khubor ka pyntip  sha baroh ki nonghikai SSA kiba don hapoh ka lama jong ka Meghalaya SSA School Association (MSSASA) ba naduh mynta ka sngi kitei ki dkhot  baroh kiba la shah weng kam kim don bynta  eiei shuh bad ki kam jong ka Synjuk.