Weng noh iaki Kuki & 37 kiwei pat ki sub-tribe bad ki Naga na ka schedule tribe ka Meghalaya

Syllad | The Rising MeghalayaJuly 13, 2024

Ka Jaintia Coordination Committee on Reservation Policy (JCCRP) kala ban jur halor ka jingdonkam ban pynthymmai ia ka hukum jong ka Constitution (Scheduled Tribe) Order, 1950 kaba iadei bad ka thup jong ki Scheduled Tribe ha Meghalaya.

Ka JCCRP ka la buh ia kane ka jingdawa ha ka jingthoh ba la ai sha u Secretary jong ka Expert Committee halor ka Reservation Policy ha Shillong haka 12 tarik Naitung.

Katkum ka jingpynpaw, ka JCCRP ka la pyntip ba ka don ka jingthoh kaba kdew iaka Jaiñtia ne ka Pnar kum ka Synteng dei ban weng noh namar ba ka pynjah burom katkum ka jinglong jingman.

Ka JCCRP ka kala pynpaw ba ka Scheduled Tribe jong ka Meghalaya ka dei ban pynpaw ïa ki riewlum trai ri Khasi, Jaiñtia bad Garo namar ba ha kiwei pat ki Jylla ka thup jong ki Scheduled Tribe ka kynthup tang ïa ki riewlum.

Ka JCCRP ka la kyntu ia ka sorkar ba kan bishar bad pynkylla ia ka hukum Scheduled Tribes jong u snem 1950 ha kaba iadei bad ka Meghalaya.

Ka JCCRP kala dawa ruh ban weng noh ïa ki katto katne ki jaitbynriew, kum ki Kuki bad ki 37 tylli ki jaitbynriew rit paid ne sub-tribe, na ka thup jong ki Scheduled Tribes na ka bynta ka Jylla Meghalaya. Nalor kata, la dawa ruh ban weng ia baroh ki jaitbynriew Naga na kane ka thup.

Reservation Policy: Dawa ka JCCRP ban bhah lang noh ia ka 80% ia ki Khasi, Jaintia bad Garo

Ka JCCRP kala ong ruh ba ka jingpynbna Scheduled Tribes ka long ban ai jingïarap bad jingkyrshan ïa ki jaidbynriew kiba la shah iehnoh beiñ kiba donkam iaka bhah kyrpang haka imlang sahlang, ka ioh ka kot, bad ka jingnang jingstad jong ki.

Kumta ka JCCRP kala kyrpad ia ka sorkar ba kan shimkhia mardor ban pynbeit thymmai ia kane ka thup ban pyni ia ka jinglong jingman jong ka jylla Meghalaya kaba mynta. Ka JCCRP kala ong ba kane kan iarap ban iada ia ka hok bad jingmyntoi jong ki riewlum kiba dei hok shisha ban ioh ia ka jingiada bad jingmyntoi ba la ai da ka kyrdan Scheduled Tribes.