Weng noh ka JHTOA iaka jingiakhih hadien ba ka mynjur ki karkhana ban ai kit dewbilat 40 trok shisngi

Syllad | The Rising MeghalayaOctober 9, 2023

Ka seng ki trai trok hapoh ka lama Jaintia Hills Truck Owners’ Association (JHTOA) ka la weng iaka jingiakhih kaba khlem buh por hadien ba ka synjuk ki karkhana pynmih khyndew bilat kiba don haka thain East Jaintia Hills District kila mynjur ban ai bhah ban kit 40 tylli ki trok haka shi sngi.

Iaka kane ka rai la shim hadien ka jingialang ka synjuk JHTOA, ki synjuk ki karkhana dewbilat, ka East Jaintia Hills Truck Owners and Transporters Association (EJHTOTA) bad ka bor synshar district jong ka East Jaintia Hills District haka sngi Nyngkong.

Kane ka jingialang kala iakut ban ai mar 40 trok shi sngi iaka JHTOA bad ka EJHTOTA.

Haba iakren bad u President ka JHTOA u Bah Biangshwa Shylla ula iathuh shwa ba ka JHTOA kan shim iaka rai ban weng noh iaka jingiakhih, ka la don ka jingialang pynbeit hapdeng ki bor pyniaid District jong ka East Jaintia Hills ba kynthup u Additional Deputy Commissioner bad Superintendent of Police, ka JHTOA kumjuh ka synjuk ki karkhna pynmih khyndew bilat hapoh ka lama Jaintia Hills Cement Manufacture Association bad ka East Jaintia Hills Truck Owner and Transport Association (EJHTOTA) ban iakren iaki mat jingdawa jong ka JHTOA.

Ula ong ba ha kane ka jingialang ka synjuk ki karkhana pynmih khyndew bilat ki la kular ban ai 40 tylli iaka JHTOA bad 40 tylli iaka EJHTO&TA bad kane ka jingiapynbeit kan long na ka bynta shibnai shwa.

Ha kajuh ka por ula ong ba ka ophis u DC bad SP kin khein ban ai katkum ka jingdon ki kali hapdeng kine ki ar seng ka JHTOA bad EJHTOTA.

Kumban shu pynkynmaw ka JHTOA ka la pynlong iaka jingiakhih kaba khlem buh por naduh 5 tarik Risaw ha Tuber Tahkhniang namar ba ki karkhana pynmih khyndew bilat kiba don haka thain Lumshnong, Wahiajer bad Thangskai na ka por sha ka por ki shukor bad kim ju ai bhah iaki trok trai jylla ban kit mar katkum ka jingiakut.