Weng noh ka NPP na ka jingkyrshan ia ka Sorkar BJP ha Manipur bym lah pynkut ia ka jingiakynad

Syllad | The Rising MeghalayaNovember 18, 2024

Ka National People’s Party (NPP) ha ka 17 tarik u Naiwieng ka la shim ia ka rai ban weng noh na ka jingkyrshan ia ka Sorkar BJP ba la ialam da u Biren Singh namar ka jingbym lah ban pynkut noh ia ka jingiakynad bad wanrah pat ia ka jingsuk hapoh ka Jylla Manipur.

Ha ka shithi sha u National President ka BJP u Jagat Prakash Nadda, u National President ka NPP uba dei ruh u Myntri Rangbah ka Meghalaya u Conrad K Sangma u la ong, “Ngi don ka jingsngew kaba skhem ba ka sorkar Manipur hapoh ka jingialam jong u Biren Singh ka la pulom pura ban lah ban pynbeit ia ki jingeh bad ban wanrah pat ia ka suk ka sain ha ka Jylla.”

“Da kaba khmih bniah halor kane ka jinglong jingman ba mynta, ka NPP ka la shim ia ka rai ban weng noh ia lade na ka jingkyrshan ia ka sorkar ba la ialam da u Biren Singh hapoh ka jylla Manipur bad ka ban treikam mardor,” u la ong.

“Naduh kine ki khyndiat sngi ba la dep ngi la sakhi ba ka jinglong jingman ha Manipur ka la nanghiar arsut ha kaba ki la nang don shuh ki riew paidbah ba lui lui kiba la duh ei ia la ka jingim bad kiba mad ia shibun ki jingeh jingjynjar, bynrap u Conrad ha ka shithi.

Lah ban kdew ba ka NPP ka don haduh 7 ngut ki MLA hapoh ka iingdorbar thaw ain kaba don 60 ngut ki dkhot hapoh ka Jylla Manipur. Da ka jingweng noh ka NPP ka jingbun paid ka sorkar synrop ka Manipur naka 53 kala hiar sha ka 46.

Shuh shuh wat ki MLA jong ka BJP ruh kila pynpaw iaka jingbymsngew hun ha kaba ki 19 ngut ki MLA BJP ruh kila pynpaw iaka jingpyrshah iaka jinglong nongialam u Biren Singh kaba la nang tynjuh bad buh jingeh ia u myntri rangbah ka Manipur.