Weng noh ki nongtrei SSA iaka jingiakhih hadien ba mynjur ka Sorkar ban pynbeit bad pynkiew ia ka tulop

Syllad | The Rising MeghalayaAugust 20, 2024

Ka All Meghalaya SSA Non-Teaching Staffs’ Association (AMSSANTSA) haka 20 tarik Nailar ka la weng noh ia ka jingiakhih shong kyllain mungor kaba la long ha kine ki 21 sngi kynthih hadien ba ka sorkar jylla ka la mynjur ban pynbeit thymmai bad ban pynkiew ia ka tulop jong ki.

Katkum kane ka jingmynjur, ka jingsiew iaka tulop thymmai kan treikam naduh ka 1 tarik Iaiong, 2024.

Kane ka jingmynjur ka la wan hadien ka jingïalang jong ka Rationalisation Committee kaba khlieh da u Commissioner & Secretary, Education, u Vijay Mantri ha ka 19 tarik Nailar.

Ka sorkar jylla ka la mynjur ia ka jingai jingmut jong kane ka komiti ban sdang ia ka tulop thymmai naduh ka 1 tarik Iaiong, 2024, la ong u Mantri

“Baroh ki nongtrei SSA mynta kin ioh 2% ka seniority allowance manla ka snem naduh ka 1 tarik Iaiong, 2024,” ula ong Mantri

Ka komiti ka la ai jingmut ruh ba dei ban peit bniah ia ka kyrteng ki nongtrei ha baroh ki ophis jong ki district shuwa ban phah ia ka jingai jingmut sha ka sorkar jylla.

Kino kino ki nongtrei kiba shah ieh dei pynrung haka jingpynbeit tulop thymmai shuwa ban  buh iaka jingtywa sha ka tnad.

Ka sorkar jylla ka la bthah ruh ia u State Project Director, SSA ban pyrkhat iaka jingai jingmut jong ka Rationalisation Committee ba dei ban pynkiew tulop shi snem 5% naduh u snem 2025-26.

La ong ruh ba ka tulop ba la pynbeit naduh ka 1 tarik Iaiong, 2024 dei ban khmih biang hadien 5 snem.

La bthah ruh ia u SPD, SSA ban wan lad lynti ban pynrung iaki nongtrei SSA hapoh ka EPFO ban ioh jingmyntoi na ka Provident Fund nalor ban pynrung haka Meghalaya Health Insurance Scheme (MHIS) na ka bynta ki nongtrei SSA.

Ki nongtrei SSA ki ba la bynshet ban trei ha kiwei pat ki tnat sorkar khlem kano kano ka jingsiew, bad ka bai leit bai wan, ha kaba iadei bad kane la rai ba u SPD, SSA u dei ban ai jingbthah sha kiwei ki tnat sorkar.

La bthah ruh ia u SPD, SSA ban pynthikna ban pyllait pisa pisa na ka bynta ki jinglut jingsep ha office bad ki tiar kum ka furniture bad ban pynbiang ia ki jaka treikam kiba biang ha ki Cluster bad Block Levels na ka bynta ki BRPs, CRPs bad kiwei ki nongtrei SSA.

Haba pdiang sngewbha iaka rai jong ka sorkar; ka president All Meghalaya SSA Non-Teaching Staffs’ Association (AMSSANTSA), kong Jennyfer Synrem, ka la ong, ” Ngi la rai ban weng noh ïa ka jingïakhih shong kyllain mungor kaba khlem buh por hadien ba ka sorkar kala pynurlong ïa ki jingdawa jong ngi kiba kynthup 2% ka seniority allowance bad bad 5% ka annual increment. Watla, ngim ïoh 80 % ka jingpynkiew tulop hynrei ngi sngewhun haba ka sorkar ka la rai ban pynbeit iaka rukom treikam.”

“Ka jingthaw ia ka Rationalisation Committee, ha kaba ngi ruh ngi dei ki dkhot, kala iarap shibun ban ioh pynsngew ha kaba iadei bad ka jingduna ha rukom siew tulop. Ngi ioh mynta ia ka tulop bapher bapher katkum ka seniority ym kum mynshuwa ba ki nongtrei kiba thymmai ki ioh tulop kumjuh bad kiba la trei la 18 snem,” ka la ong.

“Ngi sngewkmen ba ka tulop thymmai kan treikam naduh ka 1 tarik Iaiong, 2024. Ngi ai khublei ia ka sorkar ha ka jingialam jong u Chief Minister Conrad K Sangma uba la pynbeit iaka jingeh jong ngi lyngba ka committee.”

“Shuwa ia kane, ngi la kyntait ia ka jingpynkiew tulop 25% ka sorkar namar ba jan mar shiteng ki nongtrei SSA ym shym la shah kynthup hapoh ka jingtyrwa bad kam nongrim namar ha kine ki 8 snem ba la dep ym shym la kyntiew tulop iaki nongtrei SSA,” ka la ong ka kong Synrem

“Haba iadei bad kane ka rai jong ka sorkar ban pynbeit ia ki jingeh jong ngi, ngi sngew ba kam donkam shuh ban mih surok ban iakhih,” ka la bynrap.