Weng shuwa ka MSSASA iaka jingiakhih, dawa na ka sorkar ban pyllait ia ki nonghikai SSA na ka MTET

Syllad | The Rising MeghalayaDecember 17, 2024

Ka Meghalaya SSA Schools Association (MSSASA) ha ka 16 tarik Nohprah ka la rai ban weng noh shuwa ia ka jingthmu khot pynlong jingiakhih bad ban bteng iaka jingiakren bad ka sorkar jylla na ka bynta ban weng ia ki jingeh ki nonghikai SSA kiba don palat 13000 ngut ha ka jylla.

Haba kren sha ki lad pathai khubor, u president ka MSSASA u bah Aristotle C Rymbai u la pyntip ba ka seng ka la shim lai tylli ki rai ha ka jingialang kaba long ha Madan Students’, Jaiaw hadien ba ka sorkar ka la khot ia ki ban iakren ha ka 18 tarik u Naiwieng bad ka 4 tarik u Nohprah.

“Ngi la rai da kawei ka sur ban weng noh shuwa ia ka jingthmu ban khot pynlong jingiakhih namar ba ngi la rai ban bteng ia ka jingiakren bad ka sorkar”, u la ong.

U Bah Rymbai u la ong ruh ba ka seng ka la rai ban ai jingmut bad kyrpad ïa ka sorkar ba kan pyllait noh ïa baroh ki nonghikai SSA, kiba la rung kam naduh 1 tarik Naitung, 2020 ban pyndep ïa ka eksamin Meghalaya Teachers’ Eligibility Test (MTET).

“Kane kala wan long namar katkum ka jingpynbna ba la pynmih da ka sorkar jylla ha ka 1tarik Naitung, 2020 la kdew shai ba ka MTET ka dei kaba donkam ha ka jylla Meghalaya. Namarkata, ngi la rai da kawei ka sur ba ka sorkar ka dei ban pyrkhat ïa baroh ki nonghikai SSA, kiba la rung kam ha lane shwa ka 1tarik Naitung, 2020 ban pyllait ïa ki na ka eksamin MTET,” u la ong.

Shuh shuh, ka MSSASA ka la dawa na ka sorkar jylla ban thaw ia ka empowered committee halor kane ka mat jong ki nonghikai SSA, kiba kynthup ia ka jingdawa ban wanrah ia ka polisi kaba iadei bad ka jingshngain ka kam ki nonghikai SSA ha ka jylla Meghalaya.

Ki dkhot jong kane ka komiti ki dei ban long na  tnad Law, personnel, finance, planning, education bad ki dkhot na ka seng, la ong u Rymbai.